April 4. Truce, until 1 April 1473, between Lewis K. of France, Charles duke of Burgundy, and Francis duke of Brittany, Edward K. of England being comprehended as an ally of the duke of Burgundy. Soulac à Medot.
O. xi. 750. H. v. p. iii. 19. |
De Appunctuamentis Treugarum Franciae, Burgundiae, & Britanniae.
An. 11. E. 4. Ex Autogr.
Nous Official de Cambray, & Nous Bourmaistres, Eschevins, & Conseil de la Ville de Brouxelles, a tous ceulx, qui ces presentes Lettres verront, Salut.
Savoir faisons que Nous avons veu & leu certaines Lettres Patentes de Tres hault & Tres puissant Prince le Roy de France, seellees de son Grant Seel en Cire jaune, & Signees de sa Main, des quelles la Teneur s'ensuit,
Loys, par la Grace de Dieu, Roy de France, a tous ceulx, qui ces presentes Lettres verront, Salut.
Commen' agaires,
Pour la Pacification des Divisions & Differens, qui ont este par a devant entre Nous & nostre Treschier & Tresame Frere & Cousin le Duc de Bourgoingne, & que desirons de nôtre part toutes Choses reduire a bonne Paix & Transquilite, & Nous mettre en tous Devoirs a fin de obvier aux Inconveniens qui pourroient avenir a cause de la Guerre,
Nous eussions Donne a nostre Treschier & Tresame Nepveu le Duc de Bretaigne, ou a ses Commis & Depputez, Povoir de faire & prendre bonne & loyal Treue entre Nous & nostre dit Frere & Cousin le Duc de Bourgoingne, & icelle Prolonguer pour tel Temps que nostre dit Nepveu le Duc de Bretaigne aviseroit,
Et soit ainsi que icelui nostre Nepveu, a ceste cause, ait envoye l'Evesque de Leon, son Conseillier, devers nostre dit Frere & Cousin le Duc de Bourgoigne, pour lui faire Ouverture des Choses dessusdittes,
Au quel, en usant de nostre dite Povoir, il a donne Povoir de Prendre ou Prolonguer avec nostre dit Frere & Cousin le Duc de Bourgoingne, telle Treue ou Abstinence de Guerre qu'il verroit estre a faire,
Le quel Evesque de Leon, en usant du Povoir & Commission a lui donne par nostre dit Nepveu le Duc le Bretaigne, & par vertu du Povoir sur ce baille a icelui nostre Nepveu, ait Fait, Conclu, Avise, & Contracte, avec les Gens, Commis, & Deputez de nostre dit Frere & Cousin le Duc de Bourgoingne, ayans aussi Povoir quant a ce d'icelui nostre Frere & Cousin, certain Treue, Sceur Estat, & Abstinence de Guerre, Communicant le xxii Jour de Mois de Mars derreinement passe, & Finissant le Premier Jour du Mois d'Auril prouchainement venant, que l'en dira Mil, Quatrecens, Lxxiij, le dit Jour inclut, ainsi qui s'ensuit.
Nous Vincent, par la Permission Divine, Evesque de Leon & Conseillier de mon Tres redoubte & Souverain Seigneur Monsieur le Duc de Bretaigne, Conte de Stampes & de Vertus &c. & President de ses Comptes, FAISONS SAVOIR a tous, qu'il appartendra, que, pour & ou Nom de mon dit Seigneur le Duc, & en usant du Povoir & Commission par lui a nous donne par ses Lettres Patentes, & en vertu du Povoir a lui sur ce baille par le Roy (les quelz Povoirs sont inserez en la fin de ces Presentes) Nous avons Fait, Conclu, Advise, & Contracte avec Nobles & Puissans Seigneurs, Messire Guillaume Hugonet Seigneur de Saillant & de Liz Chivaler & Chancelier, Messire Guy de Bruneu Seigneur de Humbercourt & Conte de Meghe Chambellan & Lieutenant General es Pais de Liege & de Loz, & Messire Guillaume de Bisches Seigneur de Clary Premier Maistre d'Ostel, aussi Chevaliers & Conseilliers de Treshault & Trespuissant Prince Monsieur le Duc de Bourgoingne, ayans aussi Povoir quant a ce de mon dit Seigneur de Bourgoingne (le quel Povoir est semblablement insere en la fin de ces dites Presentes) bonne & loyale Treue entre le Roy & mon dit Seigneur de Bourgoingne (sans Prejudice ou Innovation de la Treue encores durant, & icelle neantmoins demourant en sa Force & Vertu pour le Temps) en la Forme, & soubz les Conditions qu'il est contenu & declaire es Articles qui s'ensuivent.
Pour plus convenablement & aiseement parvenir a l'Apaisement des Guerres, Questions, & Differens estans entre le Roy & Monseigneur le Duc de Bourgoigne, a este faitte, concluee, & accordee, entre les dites Seigneurs, bonne, sceure, & loyale Treue, sans Prejudice de la Treue presentement courant, & qui Expirera le Premier Jour d'Auril prochainement venant, en la forme & maniere contenue & declairee en Articles qui s'ensuivent.
Premierement, bonne, seure, & loyale Treue, Seur Estat, & Abstinence de Guerre sont Prinses, Fermees, Conclutes, & Accordees, par Terre, par Mer, & Eaues doulces, entre le Roy & mon dit Seigneur de Bourgoingne, leurs Pais, Terres, & Seigneuries, Subgetz, & Serviteurs, icelles Trues, Seur Estat, & Abstinence de Guerre, Commancant le Jour d'huy, & Finissant le Premier Jour d'Auril que l'en dira l'An Mille, Quatrecens, Soixante tierze, le dit Jour inclu; pendant les quelles Treues, Seur Estat, & Abstinence de Guerre, cesseront, d'une part & d'autre, toutes Guerres, Hostilitez, & Voyes de Fait, & ne seront faiz par ceulx de l'un Party sur l'autre, de quelque estat qu'ilz soient, aucuns Explois de Guerre Prinses ou Entre prinses de Villes, Citez, Chasteaulx, Forteresses, ou Places, tenues & estans en la Main & Obeissance de l'un ou de l'autre, quelque Part quelles soient scitutes & assises, par Assault, Sieges, Emblees, Eschellemens, Composicions, ou autrement en quelque forme ou maniere que ce soit, suppose que les Habitans
des dites Villes, Citez, Chasteaulx, Places, ou Forteresses, ou ceus qui en auront la Garde, les voulisissent Rendre, Bailler, & Delivrer de leur voulence, ou autrement, ou eulx mettre ou Parti & en Obeissance de ceulx de Parti Contraire: Ou quel cas, s'ils advenoit, celui pour le quel ou l'adveu du quel auroit este Prinse la Ville, ou Villes, Places, Chasteaulx, ou Forteresses, les seront tenus faire Rendre, & Restituer plainement a celui sur qui la ditte Surprinse auroit este faitte, sans en delayer la Restitution pour quelconque cause ou occasion que ce soit avenu en dedens Huit Jours apres la Sommation sur ce faitte de l'une des dites Parties a l'autre: Et ou cas que Deffault y auroit, celui sur qui la ditte Prinse auroit este faitte pourra Recouvrer les dite Ville ou Villes, Citez, Places, Chasteaulx, ou Forteresses, par Sieges, Assaulx, Eschellemens, Emblee, Composicion, par Voie de Fait & Hostilite de Guerre, au autrement, ainsi qu'il pourra sans ce que l'autre y donne Resistence ou Empeschement, ou que a l'occasion de ces dites presentes Treue, Seur, Estat, & Abstinence de Guerre puissent estre diz ne entenduz Rompus ne Enfraintes; Mais demoureront, le dit Temps durant, en leur plaine & en vere Force & Vertu: & si sera tenu celui qui n'aura, faitte la ditte Restitution, Rendre & Paier tous Coustz & Dommaiges, qui auront este ou seroient faiz & soustenuz en general & particulier par celui ou ceulx sur qui la ditte Prinse auroit ainsi este faite.
Item, & par les Gens de Guerre, ou autres du Parti ou Aliance de mon dit Seigneur de Bourgoingne, qui y vouldront estre Comprins, ne seront faittes aucunes Prinses de Personnes, Courses, Roberies, Pilleries, Logiz, Apatiz, Ranconnemens, Prinses ou Destrouses de Persons, de Bestes, ou d'autres Biens quelzconques sur les Terres, Villes, Places, Seigneuries, au autres Lieux estans du Parti & Obeissance du Roy: Et pareillement par les Gens de Guerre, & autres estans du Parti & Aliance du Roy qui vouldront estre Comprins, sur les Terres, Villes, Places, Seigneuries, & autres Lieux estans du Parti & Obeissance de mon dit Seigneur de Bourgoingne; Ainsi seront & demouront tous les Subgetz & Serviteurs d'un Coste, & d'autre, de quelque Estat, Qualite, Nation, ou Condition qu'ilz soient, chascun en son Parti & Obeissance, seurement, sauvement, & paisiblement de leurs Personnes, & de tous leurs Biens, & y pourront Labourer, Marchander, faire & pourveoir toutes leurs autres Besoingnes, Marchandises, Negociations, & Affaires sans destourbier ou empeschement quelconque, & tout ainsi comme en temps de Pais.
Item, & s'aucune Chose estoit faitte ou attemptee au contraire de ceste presente Treue, Seur Estat, & Abstinence de Guerre, ou d'aucuns des Points & Articles, qui y sont contenuz, ce ne touchera ou portera Prejudice fors a I'Infracteur, ou Infracteurs seulement, la ditte presente Treue tousjours demourant en sa Force & Vertu le dit Temps durant: Les quelz Infracteur ou Infracteurs en seront Pugnis si griesment que les Cas le requerront, & seront les Infractions, s'aucunes sont, Reparees & Remises au Premier estat par les Conservateurs cy apres nommez presentement se la Chose y est disposee, ou du plustart commenceront a y besoingner dedens Six Jours apres que les dite Infractions seront venues a leur Cogoissance; Et ne departeront les diz Conservateurs, d'une Part ne d'autre, d'ensemble jusques a ce qu'ilz auront Appointie, & fait faire les dittes Reparations, ainsi qu'il appertiendra & queles Casle requerront.
Item, & pour la Part du Roy seront Conservateurs pour la Conte du Saint Waleroy, & les autres places a l'environ, Monsieur le Mareschal de Gamaches,
Pour Amiens, Beauvoisiz & Marches environ, Monsieur le Mareschal de Loheac,
Pour Compeiengne, Noyon & Marches environ, le Bailli de Vermendois,
Pour Hein. Jehan Manchlir,
Pour Saint Quentyn Boham & les Deppendences, & la Conte de Guise, Monsieur de Moy,
Pour la Terrache & Rochelois Monsieur de Villiers,
Pour la Chastellenie de la Fere & Laon, le Prevost de la Cite de Laon,
Pour toute la Champaigne Monsieur de Chaslillon, y pourra commettre,
Pour le Pais du Roy, environ les Marches de Bourgoingne, Monsieur le Conte Dauphin d'Avergnes, y pourra commettre,
Pour le Baillie de Lionnois, le Bailli de Lion,
Pour toute la Coste de la Mer de France, Monsieur l'Admiral, y pourra Commettre.
Item, pour la Pais de mon dit Seigneur de Bourgoingne seront Conservateurs pour les Pais de Ponthieu & de Vyineu Messire Phelip de Creuecueur, Seigneur des Guerdes,
Pour Corbie, & la Prevoste de Feulloy & Beauquesne le Seigneur de Contay,
Pour Peronne & la Prevoste du dite Peronne, le Seigneur de Hargerie,
Pour Mondidier & Roye Beaulieu & Nele, Messire Jaques de Montmartin,
Pour Artois, Cambresiz, & Beaurenoir Jehan de Longueval Seigneur de Vaulx,
Pour la Conte de Marle Monsieur de Humbercourt,
Pour les Paiis de Haynnau Monsieur d'Aymeries, Grant Bailli de Haynnau,
Pour les Pais de Liege & de Namur Monsieur de Humbercourt Lieutenant de mon dit Seigneur es dites Pais,
Pour le Pais de Lucembourg le Gouverneur de Lucembourg Marquis de Ruchelin,
Pour les Pais de Bourgoingne, Duchie & Conte, & les Villes, Places, & Pais Conquises a l'environ, Monsieur de Roussi Gouverneur de Bourgoingne, qui y commettra en chascun Lieu particulierement ou il sera besoing,
Pour le Pais de Masconn. & Places Conquises a l'environ Monsieur de Clessy Gouverneur du dite Masconnois,
Pour le Pais & Conte d'Auxerre & Places Conquises a l'environ, Messire Cristian de Thouloigon, Gouverneur du dite Auxerre,
Pour la Ville & Chastellenie de Bar sur Seine, & Places Conquises a l'environ, Monsieru d'Estchavez,
Pour la Mer de Flandres Messire Josse de Lalaing Admiral,
Pour la Mer de Holland, Zelland, Artois, & Boulenois Monsieur le Conte de Boucham, Admiral es dite Lieux,
Item, les quels Conservateurs particuliers, qui ainsi sont Commis pour la Part du Roy, & pour la Part de mon dit Seigneur de Bourgoingne, ou leurs Subroguez ou Commis, s'ils avoient legitime Excusation de non y vacquer en Personne, C'estassavoir, les Deux de chacune Marche pour les Deux Costez, seront tenus d'eulx Assembler chascune Sepmaine le Jour du Mardi, une fois es Limites du Roy, & autre fois es Limites de Monseigneur de Bourgoigne, & en Lieux propres & convenables qu'ilz adviseront, pour Communiquier ilec de toutes les Plaintes & Doleances qui seront servenues d'un Coste & d'autre touchant les dites Treues, & prestement en Appointier ainsi qu'il apportient: Et s'il advenoit que, pour aucune Grant Matiere, il y eust Difficulte entre eulx, dont ilz ne se peussent Appointier, ils seront de Signiffier & faire savoir incontinent, C'estassavoir, les Conservateurs de la part du Roy pour les Marches de par deca a Monsieur le Connestable, & des Marches de Bourgoingne a Monsieur le Conte de Comminge Mareschal de France: Et les Conservateurs de la part de mon dit Seigneur de Bourgoingne es Marches de par deca a Monsieur le Chancelier & Gens de Conseil de mon dit Seigneur de Bourgoingne: & aux Marches de Bourgoingne a Monsieur de Roussy, Gouverneur & aux Gens du Conseil estans adinviron, la qualite des dites Plaintes, & ce qu'ilz en auront trouve; les quelz seront tenuz incontinentz & le plus brief que fiare se pourra, apres la ditte Signification, vuyder & decider les dites Plaintes & Dolenances, & en faire Jugement & Decision, telz que en leurs Consciences ilz aviseront estre a faire.
Item, & ou Cas que a cause des dittes Difficultez les diz Conservateurs R'envoyeroient les dittes Plaintes ainsi que dit est, & s'il y a Pesonne Empeschie, les diz Conservateurs leur pourvoyeront deslargissement, & aussi auront Puissance & seront tenuz le bailler Seurete aux Plaintifs pour aler faire leurs Poursuites es Lieux ou ilz seront r'envoyez: Et s'il avenoit que aucuns des diz Conservateurs se voulsissent excuser d'Entendre es dittes Reparations maintenans les dites Infractions non estre Advenues en ses Limites, il sera en ce Cas tenus le signiffier au Conservateur es Limites, du quel il Maintiendra les dittes Infractions estre advenues; le quel Conservateur, ou Cas qu'il ne voudra entreprendre la Charge d'Entendre seul a la ditte Reparation, sera tenu d'Assembler avec l'autre Conservateur, qui lui aura fait ou fait faire la ditte Signiffication, pour ensemble avec le Conservateur & Conservateurs de l'autre Coste besoingner es dittes Reparations par la maniere dessusditte.
Item, & seront les Jugements, que seront les dites Conservateurs d'une part & d'autre, Executez realment & de fait, & a ce seront Contraints les Subgetz d'une part & d'autre, non obstant Opposicions & Appellations quelzconques, & sans ce que les Condempnez puissent avoir & obtenir aucuns Remedes au contraire en quelque maniere que ce soit.
Item, & s'il avenoit, que Dieu ne vueille, que la Chose retournast en Guerre, les dittes Infractions ne laisseront pas pour tant a estre Reparees, & les Infractions des dittes Treues Pugniz & Corrigez; Mais seront tenuz les diz Conservateurs de les faire, ou faire faire
chascun de sa Part, ainsi & en la maniere que dit est.
Item, en ceste presente Treue sont Comprins les Aliez d'une Part & d'autre, assavoir pour la part du Roy, Tres haulx & Tres puissans Princes, le Roy de Castille & de Leon,
Le Roy d'Escosse,
Le Roy de Dampmarche,
Le Roy de Jherusalem, & de Cecille, & d'Arragon,
Le Roy de Honguerre,
Le Duc de Sauvie,
Le Duc de Milan & de Genues,
L'Evesque de Mex,
La Seigneurie & Communaulte de Florence,
La Seigneurie & Communaulte de Berne, & leurs Aliez,
Ceulx de la Langue de la haulte Alemaigne, & ceulx du Pais de Liege, qui se sont declairez pour le Roy,
Se Comprins y vueillent estre, & dont ilz feront declaration, en dedens le Premier Jour de Juillet prouchainement venant.
Et pour la part de mon dit Seigneur de Bourgoingne, il y comprent des maintenans le Roy d'Angleterre & le Duc de Bretaigne, les quels se sont declairez, y voullont estre comprins,
Et aussi y seront Comprins,
L'Emperor,
Le Roy d'Escoce,
Le Roy de Portugal,
Le Roy Fernande de Cecille,
Le Roy d'Arragon,
Le Roy de Cecelle,
Prince de Castille Filz d'icelui Roy d'Arragon,
Le Roy de Dampmarche,
Le Roy de Honguerre,
Le Roy de Poulaine,
Le Duc de Calabre & de Lorraine,
Madam de Savoie,
Le Duc son Filz,
Le Conte de Romont,
Et Maison de Savoie,
Le Duc d'Autriche,
Le Duc & Seigneurie de Venise,
Le Conte Palatin,
Le Duc de Cleves,
Et le Duc de Jullers,
Les Arcevesques de Mayant, Treves, Coulongne,
Et Conte d'Armignac,
Les Evesques de Liege du Trech, & de Munstre,
Se Comprins y vueillent estre, dont ilz seront tenuz de faire Declaration en dedans le Premier Jour de Juillet, prouchainement venant.
Item, pour le Bien & Proufit des Subgetz, des Pais, d'une Part & d'autre, les Manans & Heretans, & toutes Gens & Personnes des Pais de Bourgoingne, Charrollois, Masconnois, Auxerrois, Bar sur Seine, & d'autres Pais, & Villes, estans en l'Obeissance de mon dit Seigneur de Bourgoingne par dela, de quelque Estat qu'il soient, reserve Gens de Guerre, pourront Aler & Retourner, de l'un d'iceulx Pais en l'autre des dites Pais, a Pie, ou a Cheval, par Mer, Eaues doulces, a tout leurs Chevaulx, ou autres Montures, Charriotz, Charrettes, Biens, Denrees, & Merchandises, & autres Biens quelzconques, venir es Pais de Flandres, & autres Pais de mon dit Seigneur de Bourgoingne, pardeca Acheter, Mener, & Recevoir, faire Acheter, Mener, & Recevoir, par quelque Contracte ou autrement en quelque maniere que ce soit, toutes Denrees, Marchandises, & autres Biens quelzconques, & eulz en Retourner aussi avec tous Charriots, Charrettes, Charroits, Carretons, de quelque Nation ou Contree les pourront mener, soient Charges ou non des dites Denrees, Marchandises, & Biens quelzconques; Et pareillement ceulx des dites Pais de Flandres, & autres Pais de mon dit Seigneur de Bourgoingne par deca pourront Aler es dites Pais de Bourgoingne, Masconnois, Charrollois, Auxerrois, & autres estans en l'Obeissance de mon dit Seigneur de Bourgoingne par dela, a tous leurs Biens, Denrees, & Marchandises quelzconques, pour y Acheter, Commuer, & Lever a quelque Tiltre que ce soit Vins & toutes aultres Denrees, & Merchandises quelzconques, & les Amener es dites Pais de Flandres, & autres Pais de mon dit Seigneur de Bourgoingne par deca, sans destourbier & empeschement; & pour ce faire Passer, Repasser, & Sejourner, de Jour de Nuyt, seurement & sauvement par toutes les Villes, Pais, Places, & Lieux du Parti & Obeissance du Roy, sans demander aucun Congie, & sans destourbier ou empeschement quelzconques se ce n'estoit pour leurs propres Debtes ou Delitz qui se seroient en passant & sejournant es dites Pais; ne qu'il soit Besoing a eulx d'avoir Seure ou Sauf Conduite que ceste presente Treue.
Item, & en oultre est Accorde que l'on pourra Advituiller & Pourveoir de toutes Choses necessaires, aux Personnes & Gardes de toutes Places de Guerre d'une Part & d'autre, & pour ce faire Passer & Rappasser, par les Terres l'une de l'autre, pourveu que le Chemin directement se a donne; & ne pourront nulz autres queles dessus men-
cionnez es Articles precedens Converser, sur les Limites l'un de l'autre, sans Seurte & Sauf Conduit de Personne ayant Povoir a ce.
Item, & pour finablement Appaiser tous les dites Differens, & Besoingner a la Paix final, a la milleur sceure & honneste Forme que faire se pourra, sera tenu par les Gens du Roy & de mon dit Seigneur de Bourgoingne, & aussi par les Gens de Monseigneur le Duc de Bretaigne, telz qu'il leur plaire commettre, une Journee & Convention, en la Ville de Clermont en Beauvoisiz, le Vintieme Jour de Juillet, prouchainement venant; a la quelle sera Traictie & Pourparle de la Paix final, ou autre Appointement de tous les Differens quelz qu'ilz soient; Et ou cas que les Gens du Roy, de mon dit Seigneur de Bourgoingne, & de mon dit Seigneur de Bretaigne, ne pourroient a la ditte Journee & Convention Paciffier iceulx Differens, sera Prinse autre Journee & Convention, a tel Jour & Lieu qu'ilz s'adviseront.
Item, pour ce que mon dit Seigneur le Duc de Bourgoingne entendeit & maintient que les Places de Saint Walery, & de Rambures, Prinses par les Gens du Roy sur les Gens de mon dit Seigneur le Duc, Lui doivent estre Rendues & Restituees, en l'Estat quelles estoient au temps de leur Prinse, pour les Causes a plain declairees, par les Ambassadeurs de mon dit Seigneur, a este Accorde & Appointe, en enfuant de ce qui en estoit Dit & Appointe en la Treue precedence, que de & sur ce sera Parle & Appointe a la Journee, qui se tiendra pour le Fait de la Paix, & que, pendant & durant la ditte Treue, les dites Places ne seront Brulees ne Demolies, & aussi ne seront Fortiffiees ne Reparees autrement qu'elles estoient au Jour de la ditte Prinse faitte par les dites Gens du Roy; Et, se le contraire se faisoit, mon dit Seigneur le Duc sommera les Facteurs & les dites Places, de les Reparer prestement: & en leur Deffault, viij Jours apres, il y pourra pourveoir & proceder par voye de Fait sur les dites Facteurs & Places, sans enfraindre la dit Treue, ne que par ce le Roy ou ses Gens la puissent dire ou pretendre estre Rompue ou Enfrainte par mon dit Seigneur, ne que les dittes Places par le Roy ou ses Gens puissent estre Aides ou Sejourns ou cas dessusdit; Mais demoura la ditte Treue bone & vaillable durant le dit Temps.
Item, aussi en la ditte Journee sera Parle & Appointe de & sur la Restitution des Places & Forteresses que mon dit Seigneur le Duc, ou ses Gens pretendent avoir este Prinses depuis durant & ou Prejudice de la Presente Treue qui Expirera le Premier Jour d'Avril prouchainement venant; Et aussi sera Parle & Appointe a icelle Journee des Places & Forteresses que le Roy ou ses Gens pretendent avoir este Prinses, depuis & durant la ditte presente Treue & ou Prejudice d'icelle.
Item, & pour ce que a l'occasion des Limites pourroient sourdre pluseurs Debatz, Questions, & Differens, au Moin des quelz se pourroient accepter pluseurs Choses au Prejudice de la ditte Treue, a este & est Advise que, xv Jours apres la Publication d'icelle True, les diz Conservateurs d'une Part & d'autre en chacune Marche se Assembleront pour Determiner des dites Limites se faire le peuent; Et, ou Cas que faire ne le pourroient, feront la Rapport de leur Different, a Messirs les Deputez pour la Paix a la ditte Journee de Clermont, pour par eulx en estre fait Appointe & Ordonne, ainsi qu'ilz verront appartenir par raison.
La Quelle Treue & chacun des Points & Articles, contenuz & declairez en icelle, avons Promis & Promettons de bonne Foy, & soubz nostre Loyaulte faire Garder & Entretenir inviolablement par le Roy, & faire Publier es Paiis & Villes & de l'Obeissance du Roy, en dedens la fin de ce Mois, ou le plustost apres que par les dites Seigneurs Commis par mon dit Seigneur de Bourgoingne requis en seront; Et aussi de leur bailler & delivrer, ou Nom de mon dit Seigneur de Bourgoingne, en dedens Trois Sepmaines prouchainement venant, Lettres Patentes du Roy, continans la Ratiffication de toutes les Choses dessusdites,
S'ensuit la Teneur du Povoir baille par le Roy a mon dit Seigneur le Duc de Bretaigne.
Loys, par la Grace de Dieu, Roy de France, a tous ceulx, qui ces presentes Lettres verront, Salut.
Comme, pour la Paciffication des Divisions & Differens qui parci devant ont este entre Nous & nostre Treschier & Tresame Nepveu le Duc de Bretaigne, certaines Treues aient este Prinses entre Nous & Lui, jusques au xxij jour de Novembre prochainement venant, es quelles il a Comprins le Duc de Bourgoingne, ou cas qu'il le vouldra Tenir & y estre Comprins; Et pour ce que desirons de nostre Part toutes choses reduire a bone Paix & Transquilite, & Nous mettre en tout Devoir de obvier aux Inconveniens qui pourroient venir
a Cause de la Guerre, Nous pour ces Causes, & pour la singuliere Amour que avons a nostre dit Nepveu, Confians a plain de ses Vertus, & de l'Affection & Desir qu'il a au Bien de Nous, & de nostre Royaume, a icelui nostre Nepveu & a ses Commis & Depputez, avons Donne & Donnons, par ces Presentes, Povoir especial, de faire & prendre Treues bonne & loyale entre Nous & le Duc de Bourgoingne, & icelle Prolonger pour tel Temps que nostre dit Nepveu avisera; la quelle Treue ou Prolongation Nous Promettons, en Parolle de Roy, & soubz nostre Honneur, de Garder & Entretenir sans la Rompre, ne faire ou Commancer Guerre au dit Duc de Bourgoingne, tant qu'il Entretiendra & Gardera la ditte Treue, & les Points contenuz en icelle.
En Tesmoing de ce Nous avons fait mettre nostre Seel a ces dites Presentes.
Donne au Pontereau les Cholet, le xiij jour de Janvier, l'An de Grace Mil, Quatrecens, Soixante Douze, & de nostre Regne le Douze.
Ainsi Signe,
Par le Roy.
R. Du Boveil.
S'ensuit aussi le Povoir & Commission a nous baille par mon dit Seigneur le Duc,
Francois, par la grace de Dieu, Duc de Bretaigne, Conte de Monfort, de Richemont, de Stampes, & de Vertus.
Comme ainsi soit que Monseigneur le Roy, ait voulu que Nous Employassions pour parvenir au Bien de Paix, & du tout Appointer & Estaindre les Differens & Questions qui sont entre Lui d'une Part, & nostre Treschier & Tresame Frere le Duc de Bourgoingne d'autre, & que a icelle cause nous envoyassions de noz Gens devers nostre dit Frere, & pour avoir Temps & Espasse plus convenable de ce faire, Nous ait donne Povoir & Faculte de Prendre, ou faire Prendre, ou Proroguer par Nous, ou noz Commis entre Lui & nostre dit Frere, telles Treues & Abstinences de Guerre, & jusques a tel temps convenable que verrons estre a faire, selon que de tout ce puet plus a plain apparoir, & qu'il est contenu es Lettres Patentes de mon dit Seigneur le Roy,
Savoir faisons que Nous confians & acertene des Sens, Discretion, bonne Preudonne, Loyaulte, & Conduite, qui sont en la Personne de Reverend Pere en Dieu nostre bien A'me & Feal Conseillier Vincent Evesque de Leon, icelui Envoions presentement a la ditte Cause devers nostre dit Frere, pour lui faire Ouverture des Choses qui nous semblent estre requises pour le Bien des Matieres dessusdittes; O Povoir que Nous avons Donne & Donnons a nostre dit Conseillier, de pour & ou Nom de Nous, & par y an du Povoir de ce Nous baille par mon dit Seigneur le Roy, Proroguer ou Prendre entre mon dit Seigneur le Roy & nostre dit Frere telle True & Abstinence de Guerre, & jusques a tel Temps qu'il verra estre a faire; Promettans & Promettons en bonne Foy & Parolle de Prince, que Nous aurons Aggreable tout ce que par nostre dit Conseiller sera Fait & Besoingne en la ditte Matiere, & le Ratiffierons se mestier est.
Donne en nostre Ville de Nantes, le xxix Jour de Janvier, l'An Mille, Quatrecens, Soixante Douze.
Ainsi Signe,
Francoys.
Par le Duc de son Commandement.
R. De Gouz.
Et semblablement s'ensuit le Povoir baille par mon dit Seigneur de Bourgoingne a mes dites Seigneurs de Saillant son Chancelier, & de Humbercourt son Chambellan, & Messire Guillaume de Bisches, son Premier Maistre d'Ostel.
Charles, par la Grace de Dieu, Duc de Bourgoingne, de Lothrein, de Brabant, de Lembourg, & de Lucembourg, Conte de. Flandres, d'Artois, de Bourgoingne, Palatin de Hannau, de Holland, de Zelland, & de Nameur, Marquis du Saint Empire, Seigneur de Frise, & Salins, & de Malines, a tous ceulx, qui ces presentes Lettres verront, Salut.
Comme nostre Treschier & Tresame Frere le Duc de Bretaigne Nous ait fait Advertir, que le Roy ait voulu qu'il s'Employe pour parvenir au Bien de Paix, & du tout Appointer & Estaindre les Differens & Questions estans entre Lui & Nous, & que a celle Cause il envoyast de ses Gens devers Nous; Et pour avoir temps & espace de ce faire plus convenable, ait donne Povoir & Faculte a nostre dit Frere, de Prendre ou faire Praindre, ou Proroguer par Lui ou ses Commis, entre le Roy & Nous, telles Treues & Abstinences de Guerre, & jusques a tel
Temps convenable, icelui que nostre Frere verroit estre a faire; le quel nostre Frere ait a ceste fin envoye devers Nous Reverend Pere en Dieu, nostre Treschier & bon Amy l'Evesque de Leon a ce commis en son lieu, selon que de tout ce puet plus a plain apparoir, & quil est contenu es Lettres Patentes du Roy, & es Lettres de Commission de nostre dit Frere sur ce expediees.
Savoir faisons que Nous, desirans de nostre part toutes Choses reduire a bonne Paix & Transquillite, & obvier aux Inconveniens qui pourroient venir a cause de la Guerre, confians a plain des Sens, Prudens, Loyautez, & bonne Conduite de noz Treschieres & Feaulx Messire Guillaume Hugonet Seigneur de Saillant & de Liz Chivaler nostre Chancelier, Messire Guy de Brunen Seigneur de Humbercourt Conte de Meghe nostre Chambellan & Lieutenant General es Pais de Liege & de Loz, & Messire Guillaume de Bisches Seigneur de Clary nostre premier Maistre d'Ostel, aussi Chevaliers, iceulx avons Commis, Deputez, & Ordonnez, Commettons, Deputons, & Ordonnons par ces Presentes, pour Vacquer, Besoingner, & Entendre, avec nostre dit Frere de Bretaigne, ou le dit Evesque son Commis en ceste Partie, es Choses & Matieres dessusdittes, en leur donnant plain Povoir, par ces dites Presentes, de pour & ou Nom de Nous, & avec icelui nostre Frere, ou son dit Commis, en ensert le povoir sur ce a lui baille par le Roy comme dit est, Proroguer ou Prendre entre le Roy & Nous telle Treue & Abstinence de Guerre, & jusques a tel Temps qu'il sera trouve estre a faire; la quelle Treue ou Prorogation Nous Promettons en Parole de Prince, & soubs nostre Honneur, Garder, & Entretenir sans la Rompre, ne faire ou Commancer Guerre au Roy, tant qu'il Entretiendera & Gardera la dite Treue, & les Points contenuz en icelle.
En Tesmoing de ce Nous avons fait mettre nostre Seel a ces Presentes.
Donne en nostre Ville de Brouxell. le xxi Jour de Mars, l'An de Grace Mille, Quatrecens, LXXII.
Ainsi Signe,
Par Monseigneur le Duc.
J. Gros.
En Tesmoing de ce Nous avons ces presentes Signees de nostre Main, & icelles fait seeller de nostre Seel le xxij Jour de Mars, l'An Mille, Quatrecens LXXII.
Ainsi Signe,
Vincent Evesque De Leon.
La Quelle Treue, Seur Estat, Et Abstinen Ce De Guerre, & tout le contenu es Articles cy dessuz inserez, Nous avons eu, & avons Agreable, Ferme, & Estable, & iceulx Louez, Aggreez, Ratiffiez, Confermez, & Approuvez, & par la Teneur de ces presentes Louons, Aggreons, Ratiffions, & Approuvons, & les avons promis & promettons en bonne Foy & Parolle de Roy, & sur nostre Honneur, Garder, & faire Garder, Tenir, & Observer de Point en Point, selon la Forme & Teneur des dites Articles.
Et, s'aucune Chose estoit faitte au contraire par noz Chiefs de Guerre, & autres noz Subgetz & Serviteurs, de les faire Reparer, & en faire telle Pugnition qu'il appartiendra; & pour icelle tient mieulx faire Garder & Entretenir, & Pugnir les Transgresseurs d'icelle s'aucuns en y a,
Nous avons Commis & Ordonne Conservateur d'icelle (c'estassavoir) pour la Conte du Saint Walery, & les autres places d'environ, nostre Ame & Feal Conseillier & Chambellan le Seigneur de Gamaches Mareschal de France,
Pour Amiens & Beauvoistiz & Marches d'environ nostre Ame & Feal Cousin Counseillier & Chambellan le Sire de Loheac, aussi Mareschal de France,
Pour Compiengne Noion & Marches d'environ, Bailli de Vermendois,
Pour Hem Jehan Manchlir,
Pour Saint Quentin Bohain & les deppendences, & la Conte de Guyse nostre Ame & Feal Conseillier & Chambellan le Seigneur de Moy,
Pour la Terrache & Rochelois, nostre Ame & Feal Conseillier & Chambellen le Sire de Villers,
Pour la Chastellenie de la Fere & de Laon le Prevost de la Cite du dit Laon,
Pour toute la Champaigne, nostre Ame & Feal Conseillier & Chambellan le Sire de Chalenton a presente nostre Lieutenant ou dite Pais, y pourra commettre,
Pour tous noz Pais estans sur & environ les Marches de Bourgoingne, nostre Treschier & Tresame Frere & Cousin le Duc de Bourbon, y pourra aussi commettre,
Pour le Baillie de Lionnois, le Bailli de Lion,
Et pour toute la Coste de la Mer de France, nostre Chier & Ame Cousin le
Conte de Rousillon, Admiral de France, y pourra commettre,
Semblablement aus quelz & a chascun d'eulx Nous avons Donne & Donnons, par ces dites presentes, plain Povoir, Auctorite, & Mandement especial de Pugnir & faire Pugnir tous & chacun des diz Transgresseurs des dites Treues, & faire Reparer tout ce qui sera trouve este fait contre & ou prejudice d'icelle Treue, & de Contraindre ou faire Contraindre tous ceulx qu'il appartiendra de icelle Treue Garder, Tenir, & Observer, selon la Forme & Teneur des dites Articles cy dessus inserez.
Pourveu que nostre dit Frere & Cousin le Duc de Bourgoingne Tiendra & fera Tenir la ditte Treue, la Ratiffiera & Approuvera de sa Part, & Nous en baillera ou envoyera ses Lettres Patentes seelles de son Seel, & seignees de sa Main en forme deue:
Mandons & Commandons a tous noz Lieuxtenantz, Connestable, Mareschaulx, Admiral, Visadmiral, Capitaines, Chiefs de Guerre, & autres noz Justiciers, Officiers, & Subgetz, que a nos diz Commis & Deputez, & a chacun d'eulx, ainsi que dessus est dit, ilz Obeissent & Entendent diligentement.
Et, pour ce que de ces dites Presentes l'on pourra avoir a besoingner en pluseurs & divers lieux, Nous Voulons que au VIDIMUS d'icelle, fait soubz Seel Royal ou autentique, Foy soit adjoustee comme ce present ORIGINAL.
En Tesmoing de ce Nous avons signees ces dites Presentes de nostre Main, & a icelles fait mettre nostre Seel.
Donne a Soulac a Medot le iv Jour d'Avril, l'An de Grace, Mille, Quatrecens, lxxij, avant Pasques, & de nostre Regne le xii.
Ainsi Signe soubz le reploy de la Marge,
Loys.
Et en la ditte Marge,
Par Le Roy,
Les Contez Dauphin,
D'Auvergne,
De Candale,
Les Seigneurs de Roseur,
Dachon,
Patos,
Foulcart,
Seneschal de Sertonge,
Le Sire de Blanchfort,
Et autres presens.
Tilhart.
En Tesmoing de ce Nous Official dessusdit avons fait mettre a ces Presentes le Seel de la Court Espirituelle du dite Combray, dont l'on use en semblables Choses, & Nous Bourgmaistres, Eschevins, & Conseil dessusditz, y avons pareillement fait mettre le Seel aux Causes de la ditte Ville de Brouxelles le Vinctime Jour d'Avril, l'An Mille, Quatrecens, Soixante Treize, apres pasques.
Sub Duobus Sgillis, primo, viz. (Curiae Ecclesiasticae de Cambray) de rubrâ; Secundo (Villae Brucellensis) de Viridi cerâ, pendentibus a Caudis Pergamenae. |
