July 20. Confirmation of the prorogation of the truces with France until Nov. 1, dated Lenlingham, 21 June 1410. Westm.
O. viii. 641. H. iv. p. i. 174. |
De Confirmatione Treugarum & Appunctuamentorum Franciae.
An. 11. H. 4. Franc. 11. H. 4. m. 6.
Le Roy &c. a tous ceulx, qui cestes Lettres verront ou orront, Salutz.
Savoir faisons Nous avoir veues certaines Lettres, Sellees des Seaulx de, le Reverent Pier en Dieu, Henry Evesque de Seint David, & de, noz amez & foiaulx, Henry Seignur de Beaumont, Johan Cheyne Chivaler, & Meistre Johan Catryk Licencie en Decrees,
Des quelles le Teneure s'ensuit,
Henry Evesque de Seint David, Henry Seignur de Beaumont, Johan Cheyne Chivaler, & Meistre Johan Catrik Licencie en Decrees,
Commys & Deputeez du Roy nostre Tresredoubte & Sovereign Seignur, par Luy envoiez, es Marches de Picardie, pour Assembler ovec les Messages, Commys, & Deputez pur la Partie de France, pour aucuns graundes Busoignes & Affairs, touchantz & regardantz graundement le Bonne & Utilite des deulx Roialmes d'Engleterre & de France, & le Bien Publique de yceux, sicome poet pluis au plein apparoir par les Lettres de nostre dit Seignur,
Des quelles le Tenure s'ensuit,
Henricus, Dei gratiâ, Rex Angliae & Franciae, & Dominus Hiberniae, Omnibus, ad quos praesentes Literae pervenerint, Salutem in Domino sempiternam.
Noverit Universitas vestra quòd,
Ad Honorem Dei, ac Sanguinis Christiani effusionem, malaque ac dampna irreparabilia evitanda, quae, stante Guerrâ inter Nos & Adversarium nostrum de Francia, verisimiliter & sine dubio poterunt evenire, prout jam veraciter evenerunt, sicut transacti temporis cursus edocet manifestè,
Inclinamur & assentimus ad Tractandum cum dicto Adversario nostro de Francia,
Et ob hanc Causam mittimus, de praesenti, versus partes Picardiae, Reverendum in Christo Patrem, Dominum Henricum, Dei gratiâ, Menevensem Episcopum, ac, dilectos & fideles nostros, Henricum Dominum de Beaumont, Johannem Cheyne Militem, & Magistrum Johannem Catryk Licentiatum in Decretis,
De quorum fidelitate, discretione, & Industriâ, pleniùs confidentes, ipsis Quatuor, Tribus, vel Duobus eorumdem Dedimus, &c. prout supra in Literis Dat. 20 Maii, tunc sic (viz.)
Atous ceux, qui ces presentes Lettres verront, Salutz.
Savoir faisons que, pur Vaquer & Entendre diligeaument as Choses desuisditz, solon la fourme & tenur de nostre dit Povoir, noz sumez Transportez en la Marche de Picardie, & venuz a Lieu de Lienlyngham,
A quele lieu avons troue, Reverent Pier en Dieu, Pierre Evesque de Noyon Per de France, Jaques de Chastillon Seignur de Dampierre & Rollancourt Admiral de France, Guillem Seignur de Tignouville, Chivalers & Conseillers, & Gouter Col, Secretair del Adversair de France, Commys & Deputeez pareillement pur la partie de France pur les Busoignees & Affairs desuisditz, sicome par l'inspection & lecture de lour Povoir Nous est apparu,
Du quele Povoir la Tenure s'ensuit,
Charles, par la grace de Dieu, Roy de France, a toutz ceux, qi ces presentes Lettres verront, Salutz.
Savoir faisons que,
Pour Honour & Reverence de Dieu, & pour escuir l'effusion de Sanc Humein, & les autres Maulx & Damages innumerables & irreparables, que pur le fait & occasion des Guerres, que le temps passe ont este, en ceste Roiaulme, entre noz Predecessours Roys de France, & Nous, d'une part, & nostre Adversaire d'Engleterre, & ses Predecessours Roys d'Engleterre, d'autre part, a qi vroisemblablement sont en disposicion de jour en jour d'aveigner, si Provision & Remede covenable ne estoient mys,
Desirans, de tout nostre Cuer, venir a bon Pais & Accorde ovec nostre dit Adversaire d'Engleterre, par quoy le Poeple, que Dieu Nous ad baillie & commys a Governer, puisse, en nostre temps & soubz Nous, viver en Pais & Tranquillite,
Confiantz a plein des Sens, & loiautees, circumspections, prudences, & diligences de, noz ameez & foiaulx, Pierre Evesque de Noyon, Jaques de Chastillon Seignur de Dampierre Admiral de France, Guillem Seignur de Tignouville Chamberlein, Chivalers, & Maistre Gouter Col nostre Secretair,
Yceux ensemble, les Quatre, Trois, ou Deux d'eulx, avons Ordeignes, Commys, & Deputeez, Ordennons, Commettons, & Deputons, par la Tenure de ses Presentes, pur & en lieu de Nous, pur assembler ovec Henri Evesque de Seint David, Henri Seignur de Beaumont, Johan Chesne, & Maistre Johan Catrik, Ambaxadeurs, Ordeignes, Commis, & Deputeez par nostre dit Adversair, & ovec queconqes autres Parsones a ce Commis, & eiantz Povoir suffisant de nostre dit Adversair, en quelconques Villes, Chasteux, Lieux, & Places du Paiis de Picardie, ou de Flandres, que bon lour semblera, pour la Faite du Trait de la Pais desuisdit,
Et leur avons Done & Donons, par ses Presentes, a tous ensemble, a trois, ou deuz d'eulx, en l'absence des autres, come dit est, plein Povoir, Auctorite, & Mandement especiale, de Convenir, Traiter, Composer, Transiger, Paciscer, & finalment & pleinement Accorder, de venir a bon Pais & Accorde sur toutz Debates, Contentions, Quereles, Questions, Guerres, Riotes, & Discordes mieues & a moeuers entre Nous, & noz Roiaume, Subgitz, & Seignuries, Amys, Allies, Eidantz, & Adherentz queuxconques, desa & dela la Mer, d'une part, & nostre dit Adversair, ses Roiaume, Subgitz, & Seignuries, Amys, Allies, Eidantz, & Adherentes quexconques, desa & dela la Mer, d'autre part, ensemble tous lour Articles, circumstances, incidences, emergences, dependences, & connexes,
Et tout, qanqes serra Traicte, Compose, Transige, Pacisce, Promis, Jure, & Accorde par noz desuisditz Ambaxadeurs, les Trois, ou Deux d'eulx, pour Nous & nostre Partie, avec les desuisnomez de la Partie Adverse, ou autres queconques a ce Commis depar nostre dit Adversair, eiantz a ce suffisant Povoir, come dit est, Affermer & Asseuter, par Foy & Serement, sur les Seintz Evangelys de Dieu a Jurer en l'alme de Nous, & doner & ottroier sur ce & les dependences toutz maners de Causions & Seuretees, Promesses, Obligacions, & Lettres en fourme due, soubz lour Seaux, ou des trois, ou deux d'eulx, tant & tielx come mestre serra & bonne lour semblera estre a fair en tiel Cas, les quelles Nous voloms avoir tiel effect, force, & vertu, come si Nous les avoiaumes donnez & faitz en nostre propre Parsonne,
Et ycelles Lettres Promettons avoir Agreables & Confermer par les nostres, se mester est & requis,
En ferrons de fait Executer, Expedier, & Accompler toutz Articles, que ferront Accordez, de Point en Point, pur Nous & nostre Partie, sanz fraude & mal engyn, se avant come Nous mesmes ferions se nostre propre Parsone y estoit present,
Et de fair Expedire tous autres Articles, que aucunement purroient apparteigner a la bonne parfection & accomplissement des ditz Traites & Accordes, de quelque nature q'ils soient, suppose qu'ils requirissent pluis especiale Mandement,
Et avons Done & Donons aussi, par Tenures de ses Presentes, a noz ditz Commis & Deputees ensemble, & as trois, ou deux d'eulx, come dit est, plein Povoir & Auctorite, & Mandement especial de Accorder & Prendre Prorogacion de ses presentes Treues particulers,
Ou de les Prendre & Accorder Novelx, tant es Marches de Picardie & Duchie de Guyen, come Generalx en le Mer,
Ou autres queconques maneres Treues, generalx ou particulers, tant en Terre, come en Mer, pur Nous, noz Subgitz, Amys, Confederees, & Aliez, soient a brief temps ou a longe, desa & dela la Mer, ainsi que bone, honorable, & profitable lour semblera pur la Bien de la Busoigne, & pur pluis tost venir a bonnes Pais entre Nous & nostre dit Adversair,
Et Ordeigne, Instituer, & Commettre, pur Nous & en nostre Noun, certeins Gardeins, Conservateurs, & Juges d'ycelles Treues, par eux ainsi Priz ou Proroguez, generalx ou particulers, en Mer & en Terre, come dit est, tielx & en tiel Nombre come bones lour semblera, pur la Seurte & Parmanance d'ycelles, & pur duement Refourmer, Corriger, Repairer, & Amender tout ceo que contre le Teneure, force, & vertue
de yceles Treues auroit este fait ou attempte, en Mer ou en Terre, en ascune manere,
Et Promettons, loialment & en bone foi, & en Parole du Roi, avoir & tenir, & fair tenir, a touz jours, Ferme & Stable tout qanqes fait serra en nostre Noun par noz ditz Ambaxadeurs, Comis, & Deputez desuisnomez, ensemble,ou par les trois, ou deux d'eux, come dit est, sur touz & chescunes des Choses desuisditz,
Et de en Doner noz Lettres Confirmatoirs, sealez de nostre Graund Seal, sur touz les Points & Articles que ainsi serront accordez par eux, & de les Fair Executer diligeaument, de Point en Point, en tant q'en Nous est, solon lour forme & tenure,
Et ceo Promettons sur Caucion & Obligacion de touz noz Biens, presentz & a veners, sanz jammes Faire, Dire, ne Purposer, par Nous, ne par autres, en Juggement, ou dehors, acune Chose a contrair.
En Tesmoignance de ceo Nous avons fait mettre nostre Seal a ces Presentes.
Don. a Paris, le xxx jour d'Auril, l'An de Grace Mille, Quatrecens & dix, & de nostre Regne le xxx.
Et ovec yceux Commis & Deputez, pur la dite Partie de France, avons tenu plusours Journes & Consultacions, sur les Materes desuisditz, a dit Lieu de Lienlyngham,
Apres les quelles Consultacions & Journes, eu sur ces choses grande & meure Deliberacion, d'une part & d'autre, ait semble aux desuisditz Evesque de Noyon, Dampierre, Tignouville, & Goutier, & aussy a Nous, d'une comune & mutuel Accord & Consentement, estre prealable, expedient, & necessair, honurable, & profitable pluis meurement & seurement Vaquer & Entendre aux Busoignes & Affairs desuifditz, au Bien des ditz Roialmes d'Engleterre & France, & de la Chose Publique de yceus, que certeins Treues, ou Abstinence de Guerre, que a present sont en la dite Marche de Picardie,
C'estassavoir, depuis le River de Some, jusques a la Mer, & en ycelle compriz la Ville de Gravelynges, & la Paiis de West Flandres, jusqes a la Ville de Nuesport,
Les quelles ount a durer jusques a primer jour de Juyllet proschein venant, soleil levant,
Soient Proroguez, ou Prisez de Nouvell, jusqes a certein pluis longe Terme,
Pendant le quelle l'en purra pluis seurement Traiter, Demener, & Concluder les Busoignes & Affairs desuisditz,
Et aussy que les Treues & Abstinence de Guerre, que n'adgairs avoient Cours en tout la Duchie de Guyen, & en le Conte de Tholouse,
Les quelles furent expirez & faillerent le primer jour de Moys de May darrein passe,
Soient Reprisez de Nouvel en yceles Duchie de Guyen, & la Counte de Tholoufe, jusques a certein temps,
Et semblablement que Treues Generalx soient Reprisez, en le Mer, jusqes a certein temps, que la Marchandise Puisse Seurement courir par le Mer, par quoy vray Amour poet estre nourry entre les deux Roialmes d'Engleterre & de France, & les Subgiez de ceulx,
Pur ceo est que Nous, apres le dit Avys commun, & mutuelle Accorde & Consentement, ainssi delibere parentre les desuisditz Commis pur la Partie de France & Nous, par grande & meure Deliberacion de Conseil, come dit est, ycelles Treues ou Abstinences de Guerre, estans a present en la dite Marche de Picardie,
C'estassavoir, depuis la River de Some, jusques a le Mer, & compriz en ycelle la Ville de Gravelynges & la Paiis de West Flandres jusques a Nuesport,
Les quelles ount a durer jusques a primer jour de Juyllet prochein venant, soleil levant, come dit est,
Nous par vertu du dit Povoir, a nous donne, desuis transcript, avons Proroiguez & Aloignez, & Prisez de Novel, se mester est, par la teneur de ces Presentes, pour la partie d'Engleterre, ovec les desuisditz Evesque, Dampierre, Tignonville, & Goutier, que pareillement l'ount Prorogez & Aloignez, & Prisez de Nouvelle, se mester est, avec Nous, par la partie de France, par vertue de lour dit Povoir, desuis transcript, a yceles durer du primer jour de Juylet, soleil levant, proschein venant, jusques au primer jour de Novembre, soleil levant, apres ensuiant, tout incluz,
Durantz les quelles Treues, Suffrance, & Abstinence de Guerre, cessent & cesserent en dite Paiis de West Flandres, & Marche de Picardie desuis declarez, touz Prises de Parsones, Forteresses, de Biens & Lieux queconqes, Demolumentz
de Maisons & de Murailles, toutz Laroyns, Pilleries, Robberies, & touz autres Faitz de Guerre,
Et ne serront ascuns Chasteux, Villes, ou Forteresses Assigiez, Assailez, Combatuz, Eschelez, ou Emblez, ne Parsonne ou Biens queconques Prisez, d'une part ne d'autre, es Terres, Paiis, & Liez desuisditz, soit soubz coleur de marque, Reprisaile, Causions, Promesses, Debtes, Obligacions, Vendicions, ou par autre manere queconqe, durant le temps desuisdit,
Et purront, durant le temps de ces presentz Treues ou Prorogacion de Treues, toutz les Subgitz, d'une part & d'autre, Aler & Venir, & fair lour Laborages, Busoignes, & Marchandises, & autres Choses queconqes loisible & non defenduz, Seurement & Savement, sanz estre Dommagez ou Offenduz, en Corps ou en Biens, en quelque manere que ceo soit, en Paiant toute foiz les Devoirs aunciens & autres accustumez,
Tant soulement Porveu, touz voies, que nulle, de l'une ne de l'autre Partie, n'entrera, durant le temps desuisdit, en Chasteux, Ville ferme, ou autre Forteresse de la Partie adverse, se n'est par Licence ou Consentement des Seignurs ou des Capitaines des ditz Chasteux, Villes fermes, ou autres Forteresses, ou d'autres eiantz Poair a ceo,
Et generalment & particulerment ne serra fait par les ditz Subgitz, d'une part ne d'autre, en dit Paiis de Picardie, en la Marche desuis declare, pour queconque Cause, colour, ou occasion que ceo soit, Choses queconques au contrair de cest present Teue, par voie ou manere queconque, durant le temps desuisdit.
Et se aucune Parsone ou Parsones, ou acunes Biens, Villes fermes, Chasteux, ou Forteresses estoient Prisez, ou acune Chose attempte acunement encontre le Tenure de cest present Treue, par quelque manere que ce fait, en dite Paiis de West Flandres & Marche de Picardie desus limitez & declarez, durant le temps desuisdit, il serra Restitue & Repaire tout entierment, sanz acun falt, & les Mesfaitours Puniz & Corrigez solon l'exigences de Cas, sessantz en touz les Choses desuisditz & chescun d'ycelz tout duplicite, ambiguite, fraude, & mal engyn,
Et avec ceo avons Volu & Accorde come desuis, Volons & Accordons que, pur acun Mesfait attemptat ou entreprise, s'acuns entrevenoient pendant le temps desuisdit, encontre les Choses desuisditz ou acun d'ycelles (que Dieu ne voile) ne serront ou purront pur ceo presens Treues estre tenuz ou reputez Enfreintz, ne Guerre pur ceo estre fait ou commence, par l'une des ditz Parties sur ne a l'encontre & de l'autre, mais serra tout Repaire & Mys au primer Estat & dieu, s'aucun Chose estoit ou auroit este fait a contrair de ses presentes Treues, ou le tenure d'ycelles (que Dieu ne voille) & les Delinquentz & Mesfacteurs Puniz & Corrigez solon l'exigence & enormite de Cas,
Et ne purra acun, de l'une ne de l'autre Partie, Entrer par la Paiis estans en Treues es Paiis non estans en Treues, pur y faire Guerre ou Damage en quelqe manere que ce soit,
Et, a fin que ses presentes Treues soient meulx Gardez, solon lour Forme & Tenure, sanz Enfraindre en aucune manere, Nous, par vertue du dit Povoir desuis transcript, avons Ordeinez, Constituez, & Commys, Ordenons, Constituons, & Commettons, par le Tenure de ses Presentes, Gardeins, Conservatours, & Jugges d'ycelles Treues, durant lour temps, en Paiis desuisditz, les Lieutenantz de Caleis & de Guynes, qi sont, ou pur le temps serront, jointement, & severalment,
Les quelles serront Tenuz de Jurer, & Juront es mains de Conservatours de la Partie de France, qi pur cest Treue sont ou serront Ordenez & Commys,
Et yceux aussi Conservatours de la partie de France le Jureront es Mains des desuisditz Lieutenantz, ou de l'un de eux en l'absence de l'autre,
Et de fair Tenir & Garder loialment & veritablement yceles Treues, chescun en droit soi,
Et de Repairer & faire Repairer tout ceo que serroit fait au contrair, come desuis est dit, de si tost q'il serra venu a lour Conoissance, soit par Denunciacion de Partie blestie, ou autrement,
Et, s'ils estoient feblez, de Aider les uns aux autres loialment, & de tout lour poair, sanz fraude & mal engyn, s'ils en sont requiz.
Et, ovec ceo, en ensuevant l'Advys, Deliberacion, comun Accord, & Consentement desuisditz, a fin que vray & bon Amour mutuel puisse estre nurry entre les ditz Parties & lour Subgiez, & que la Marchandise puisse avoir Cours Seurement, entre les Subgies, de l'une & del' autre Roialme, frequentantz le Mer, Nous, ovec les desuisnomez, Evesque de Noyon, Dampierre, Tignou-
ville, & Gouter, avons Priz, & Preignon de Nouvel, par le Tenure de ces Presentes, & par vertue du dit Povoir, bones, fermes, & loialx Treues generalx, entre les ditz Parties d'Engleterre & de France, & lour Subgies quexconqes, par tout le Meer,
A yceles Treues durer & demourer Seurez, en tout le Mer, depuis le viij jour d'Augst, proschein venant, Soliel levant, jusques au Primer jour de Novembre, Soleil levant, apres ensuant, touz incluz,
Pendantz les quelles Treues cesseront en Mer, entre les ditz Parties d'Engleterre & de France, & lour Subgiez queuxconqes, toutz maneres des Violences, Invasions des Robbours, Prises & Depredacions des Parsonnes, des Neefs, des Vesseux grandes & petitz, & de toutz Marchandises, Deuries, & autres Choses & Biens queuxconqes alauntz par Mer.
Item, que, pendantz ces Treues en Mer, s'aucuns des Subgitz, Armez ou Desarmez, de l'une ou de l'autre Partie, estoit mene par Vent contrair, par force de Tempest, ou Chace par aucuns Enemys, Pirates ou Robbours, & entroit en acun Port ou appliquoit a Terre, ou se, sa Neef, ou son Vessel Perisoit en Lieu estans soubz la Seignurie de l'une ou de l'autre Partie (le quelle Port ne Lieu ne fuit compriz en Treues prisez en Terre entre les ditz Parties) q'il puisse & luy loise illec Seurement Demourer & Arester,
Pourveu toutfoitz que, pendant le Temps de sa Demure, il ne face, ne procure estre faitz ou procure, Acun Grief ou Damage a la Partie adverse, en quel Territorie il serra arive,
Et, quant la dit Tempest serra cesse, & le Temps covenable viendra pur s'en aler ovec tous ses Biens, Deuries, & Marchandise queuconqes,
Suppose q'ils eussent este Prises par Fortune & Tempest, & feussent recoverez & savez,
Il le pourra faire licitement & franchement, & s'en Partir, soit par Mer, ou par Terre, ainsi que mieult luy semblera; sauve & reserve les anciens & autres accustumez Devoirs, appurtenantz as Seigneurs, s'aucuns y en a,
Et s'aucun avoit trove pris ou recele, en aucun manere, en Mer, ou en Terre, & appliquoit a son pourfit, aucuns Choses des Biens, Deuries, ou Marchandises desuisditz, il serra tenuz de les Rendre & Restituer entierment a celuy qui aura eu le dit Damage, & a ce serra constreint par le Jugge de Lieu en quelconque Jurisdiction que lez ditz Biens auroient este Priz, Recelez, ou Detenuz, cessant tout fraude & mal engyn en cest partie,
Et auroit celuy, que auroit eu le dit Damage, & pardue sez ditz Biens, plain faculte de Pursuir, toutz quantz de foitz que luy plerra, pardevant tous Juggez competents, celuy ou ceux, qi acuns des ditz Biens auroient Priz, Robbez, Detenuz, ou Receles en acun Manere, pur yceulx Reavoir & Recovrir, & en este Restitue entierment, realment, & de fait, ovec ses Dommagez & Dispenses, que pour le dit Tenir & Recelment il auroit soeffert,
Ne nulle Parsonne ne pourra Prendre ne Recever, en quelque manere que ce soit, par Marque, Reprisail, ou Entrecours, ne autrement pur quelconque Cause, colour, ou occasion que ce soit, aucuns des ditz Biens, countre la volunte & plaisir de celuy que aura eu le dit Dommage,
Reservez les Devoirs anciens & autres accustumez, s'aucuns en sont duez, come dit est,
Et s'aucuus Parsonnes, Deuries, Vesseux, ou autres Marchandises, ou Biens queuxconqes, estoient Priz par aucuns des Subgitz, de l'une ou de l'autre Partie, ou aucun Attemptat fait en la Mer, durant ces presentes Treues, il serra Restitue & Repaire entierment, par la Partie que aura fait le dit Dommage, & les Meffaitours Puniz & Corrigiez selon l'Exigence des Cas,
Ne pour acun Attemptat ou Enterprise, s'acun en estoit fait ou entrevenoit, pendant le temps dessusdite (que Dieu ne voille) ne serront ne purront ces presentz Truez ou abstinence de Guerre en Mer estre tenuz ou reputez pour Enfraintz, ne Guerre pur ce estre Commence par l'une des ditz Parties sur ne a l'encontre de l'autre; Cessantz en tous ces Choses tout ambiguite, duplicite, & malengyn.
Item, que, durant ces ditz Treues, s'acun Subgit, Arme ou Desarme, de l'une ou de l'autre Partie, autrement que dessuis est exprimez, arrvoit ou entroit en acun Port, Lieu, ou Terre ou la Seigneurie de l'une des ditz Parties (le quel Port, Lieu, ou Terre ne fuist compris es ditz Treues) sanz ceo q'il en eust demande & obtenu Licence de celuy, ou ceux, a qi il appartiendroit a la donner, il en cest Cas, serra Excluz, a son Dammage, quant a ce, de tout Benefice de ces presentes Trieues,
Ne ne pourra pur ce fair, en la Mer, ne en la Terre, aucuns Violences, Invasions, Desrobemens, Prises ou Detencions de Parsonnez ou de Biens quelxconques, de l'une ne de l'autre Partie, se ce n'estoit, touz voiez, en cas de sa just & raisonable Defence encontre ceux que luy voudroient Envaier,
Et auxi, pur pluis graund Seurte des Choses dessuidites, avons Ordeigne, come dessuis, que, durantz ces presentes Treues, le Roy nostre Seigneur ne son Adversair de France, par eux, ne par lour Subgiez, ne par autre queconque Parsonne que ce soit, ne ferra,ou purchacera, ne souffrera estre fait ou purchace, acun Chose, en quelque manere que ce soit, en Mer ou en Terre, encountre ou en prejudice des Choses desuisdites ne de chascun d'icelles; mais Punira un chascun d'eux, en droit soy, ou ferra Punir, tous les Delinquantz & Faisantz le contrair, selon l'enormite des Cas q'il auroit en ce commis & parpetrez.
Item, est Promys & Accorde, par expresse, entre Nous & les dessuisdites Commys & Deputes pur la partie de Fraunce, que, par ces presentes Treues ou Abstinence de Guerre, l'une ne l'autre Partie (c'estassavoir) d'Engleterre & de Fraunce, ne serra ne poet estre Forsclose qu'ele ne puisse Socourer, Aider, & Conforter sez Confederez & Alliez desa & dela la Mere, ainsi q'ils y sont tenuz; la suirte en la Mer demurrant toutz jours en sez Termes dessuis declarez.
Et, pour ces presentz Treus en Mer Garder & Maintenir Seurment & Inviolablement, sanz Enfreindre, durant le temps desuisdit, Nous, par vertu de Povoir dessuis transcript, avons Fait & Ordeigne, Faisons & Ordonnons, par le Tenure de ces Presentes, Conservatours generalx de sez presentz Treues par tout la Mer, pour la partie d'Engleterre, l'Admiral d'Engleterre, ou son Lieutenant, & le Lieutenant de Cinque Pors d'Engleterre, qi sont ou pur le Temps serront, jointement, & severalment,
Si Donnons & Mandons, par sez Presentes, depar le Roy nostre dit tresredoubte & Soveraigne Seignur, & depar Nous, par vertue du Povoir a Nous ottroie dessus transcript, aux Conservatours des ditz Treues, tant en Terre, come en Mere, ou a leur Lieuxtenantz, & a toutz lez autres Justicers, Officers, Capitaines de Citees, Villes fermes, Chasteux, & autres Forteresses, de Gens d'armes, Archiers, & Arbalestiers, & autres Subgitz & Obeisantz queuxconques de Roy nostre dit Seignur, ou a lour Lieuxtenantz, & a chescun d'eulx, sicome a luy appartiendra, sur quanque ils se poent meffair envers Luy, que ces presentes Treues ou Abstinence de Guerre, particulers en la Terre & generalx en la Mer, ainsi Proroguez & Prisez de Nouvel, come desuis est dit, ils facent Crier & Publier solempnement en toutz les Lieux & Places en tiel Cas accustumez,
Et yceux Teignent & facent Tenir loialment & fermement, chascun en droit soy, saunz les Enfreindre ne soeffrer estre Enfreintz, par quelconque Parsonne, en quelconque manere que ce soit, durant le temps dessuisdit,
En faisant Repairer, realment & de fait, & mettre au primer Estat & Deue, tout ce, que auroit fait ou pourroit estre fait ou attempte au contraire, au pluis tost q'il serra venu a Cognussance des ditz Conservatours, ou acun d'eulx, ou d'autri a qi il appartiendra, soit pur Compleinent de la partie Blescie, ou autrement,
Qar ainsi, par vertue de nostre dit Povoir, l'avons Nous Accorde & Promys de par le Roy nostre dit Seignur, & de par Nous, aux dessusdites Commys & Deputez de la Partie Adverse.
En tesmoignance de ce Nous avons mys noz Seaux a ces presentes.
Don. a Lenlingham, le xxi Jour de Juing, l'An de Grace Mille CCCC. & Dix.
Nous, aians fermes & Agreables icelles, Lovons, Greons, Ratifions, & Approuvons, & par le Tenure de ces Presentz de nostre certein science Confermons,
Et promettons, en bonne foie, & en parole de Roy, ycelles Tenir & Garder, & fair Tenir & Garder, de nostre Part, entierment, saunz Enfraindre, en aucune manerie, par noz Foiaulx & Subgiez quelxconques, Solon leur Four me & Teneur.
En tesmoign. de ce Nous avons fait mettre nostre Seel a ces Lettres.
Donne a nostre Palois de Westm. le xx jour de Juyllet, l'An de Grace Mille CCCC. & Dix, & de nostre Regne Unzisme.
Par le Roi & son Conseil,
Le Roy &c. ut supra usque ibi post Commissionem Regis Franciae, Et ovec yceux Commis & Deputees pour la dit Partie de Fraunce, & tunc sic,
Avons en plusours Journees & Consultacions, sur les Matiers dessusditz, au dit Lieu de Lenlyngham,
Apres les quelles Consultacions & Journes, eue sur ces Choses grand & meure Deliberacion, d'une part & d'autre,
Ait semble aux desdites, Evesque de Noyon, Daumpierre, Tignouville, & Gouter, & aussi Nous, d'une comune & mutuel Accorde & Consentement, estre prealable, expedient, & necessair, honourable & profitable, pur pluis meurement & seurement Vaquer & Entendre aux Busoignes & Affairs dessusditz, pur le Bien des ditz Roiaumes d'Engleterre & de Fraunce, & del la Chose Publique d'iceux, Que certeines Treues ou Abstinence de Guerre, qi n'adgars ont en Cours en tout le Duchie de Guyen & en la Counte de Tholouse,
Les quelles expirerent & faillirent le Primer Jour de May darreinement Passe,
Soient Reprisez de Nouvel en ycelle Duchie de Guyen & Conte de Tholouse, jusques a certein temps avenir,
Et aussi que les Treues generalx en Mer, qi semblablement ont eue Cours en tout la Mer entre les parties d'Engleterre & de Fraunce,
Et qi faillerent & furent expirez le dit Primer Jour de May darrein passe,
Soient semblablement Reprises jusqes au certein temps,
Pendant le quel temps on puisse Vaquer & Entendre Busoignes & Affairs dessusditz,
Par quoy vroy & bon Amour poet estre nourrie entre l'une & l'autre Partie d'Engleterre & de Faunce, & lour Subgiez, & que la Marchandise puisse avoir Cours Seurement par la Mer durant le temps d'icelles Treues,
Pour ce est il que Nous, apres le dit Avis comune & mutuel Accorde & Consentement, ainsi Delibere par bon Conseil & meure Deliberacion, come dit est, par vertue du Povoir dessustranscript a Nous donne, Avons Prises & Prenons par la Tenure de ces Presentes, pur la Partie d'Engleterre, ovesque les dessuisditz, Evesque, Dampiere, Tignouville, & Gouter, les queux pareillement l'ont fait & accorde ovec Nous, pour la Partie de Fraunce, par vertue de lour dit Povoir dessus transcript, bons, fermes, & loiaux Treues ou Abstinences de Guerre, en & par tout le Paiis & Duchie de Guyenne, & en la Counte de Tholouse, a ycelles Treues on Abstinence de Guerre durer es Paiis, Duchie, & Conte dessusditz, depuis le Primer Jour d'Augst, Soleil levant, proschein venant, jusques au Primer Jour de Novembre, Soleil levant, apres ensuant, toutz incluz,
Durans les quelles Treues, Souffrance, & Abstinence de Guerre, cessent & cesseront ou dit Paiis & Duchie de Guienne, & en la dit Counte de Thoulouse, toutz Prisez de Parsonnes, de Forteresses, de Biens & Lieux quelconqes, Demolissemens de Maisons & de Murailles, toutz Larcins, Pilleries, Robberis, & toutz autres Faitz de Guerre,
Et ne serront aucuns Chasteux, Villes, ou Forteresses Assegez, Assailez, Combatuz, Eschelez, ou Emblez, ne Parsonne ou Biens queconqes prises, d'une part ne d'autre, es Terres, Paiis, & Lieux, du dit Duchie de Guien & Conte de Tholouse, soit soubz colour de Marque, Reprisaill, Caucions, Promesses, Debtes, Obligacions, Vendicions, ou par autre manere queconque durant le temps dessusdit.
Et purront, pendant le temps de cest present Treue ou Abstinence de Guerre, toutz les Subgitz, d'une Partie & d'autre, aler & venir fair lour Bosoignes, Labourages, & Marchandises, & autres choses queconqes loisibles & non defenduz, Seurement & Sauvement, sanz estre Dommagez ou Offenduz en Corps ou en Biens, en quelque manere que ce soit, en paiant les Devoirs aunciens & autres accustumez,
Tant soulement Pourveu, toutesvoies, que nulle, de l'une ne l'autre Partie, ne Entrera, durant le temps dessusdit, en Chasteux, Villes fermes, ou autres Forteresses de la partie Adverse, se ce n'est par Licence ou Consentement des Seignurs ou des Capitaines des ditz Chasteux, Villes fermes, & autre Forteresses, ou d'autres aiantz povoir a ce,
Et generalment & particulerment ne serra fait, par les Subgiez d'une Partie ou d'autre, en ditz Paiis & Duchie de Guyen, ne en la dit Conte de Tholouse, pur quelque cause, occasion, ou colour que ce soit, Choses queconques au contrair de cest present Treue, Suffrance, ou Abstinence de Guerre, par voy ou maner queconque, durant le dit temps,
Et, s'aucune Parsone, ou aucuns Biens, Villes fermes, Chasteux, ou Forteresses estoient pris, ou aucun Chose aucunement attempte contre les dites Treues, Suffrance, ou Abstinence de Guerre, par queconque manere que ce fuist, en dit Paiis & Duchie de Guyen, ou la dit Conte de Tholouse, durant le temps dessusdit, il serra Restitue & Repaire tout entierment, sanz aucun fault, & les Malfaitours Puniz & corrigiez solon l'exigence des Cas; cessantz en toutz les Choses dessusdites, & chascun d'icelles, tout duplicite, ambiguite, fraude & mal engyne,
Et, ovec ce, avons Volue & Accorde, come dessuis, Volons & Accordons que, pur aucun Meffait, attemptat, ou entreprise (s'aucuns entrevenoient pendant le temps dessusdit) encontre les Choses dessuisditz ou aucun d'icelles (que Dieu ne voille) ne serront, ou purront, pur ce, ces presentes Treues estre tenuz ou reputeez Enfreintz, ne Guerre pur ce estre Fait ou Commence par l'une des dites Parties sur ne a l'encountre de l'autre, mais serra tout Repaire & Mys au primer Estat & deu, s'aucun Chose estoit ou auroit este fait a contrair de ces presentes Treues ou le Tenure d'icelles (que Dieu ne voille) & les Delinquantz & Meffaitours Puniz & Corrigiez solon l'exigence & enormite des Cas,
Et ne purra acun, de l'une ne de l'autre Partie, Entrer par le Paiis estans en Treues es Paiis non estans en Treues, pour y fair Guerre ou Dammage, en quelque manere que ce soit.
Et,
Pource que ceux, de la Partie de Fraunce, veullant maintenir que la Comte de Peitou ne est du dit Duchie de Guyen, & nostre partie d'Engleterre que la dit Conte de Peitou est, & serra compris en ces presentes Treues, sanz Prejudice d'une Partie ne d'aultre,
Et a fin que ycelles Trieues soient meultz Tenuz & Gardez, solon lour fourme & tenure, sanz Enfreindre en ascun manere,
Nous, par vertu du Pouvoir dessustranscript, avons Fait & Ordonne, Faisons & Ordonnons, par la Tenure de ces Presentes, Conservatours d'icelles Treues par tout le Paiis, Territories, & Seignuries dessusdites, le Seneschal de Guyen, les Mair & Constable de Burdeux qi pur le temps serront, ou lour Lieuxtenantz en lour absence, jointement, & severalment,
Les quelles ferront Tenuz de Jurer & Jureront es Mains de ceulx, qui de la Partie de Fraunce serront ordonnez Conservatours,
Les quelles Jureront aussi es Mains de ceux de la partie d'Engleterre,
De fair Tenir & Garder, loialment & veritablement, les ditz Trieues, chascun en droit soy, & de fair Reparer tout ce que serroit fait au contrair, come dessuis est dit, de si tost come il serra venue a lour Cognussance, soit par denunciacion de Partie, ou autrement,
Et, s'ils estoient feblez, de Aider les uns aux autres loialment de tout lour Povoir, sanz fraude & mal engyn, s'ils en sont requis,
Et ovec ce en ensuevant &c. ut supra.
Don. ut supra.
Per ipsum Regem. |
