Jan. 20. Bull of Alexander [VI.] appropriating the priories of Mottesfont and Luffield to the K.'s intended chapel at Westminster. Rome.
O. xii. 738. H. v. p. iv. 146. |
Bulla de Prioratibus Supprimendis & Annexandis.
An. 14. H. 7. Ex Origine.
Alexander Episcopus Servus Servorum Dei ad perpetuam rei memoriam.
Injunctum Nobis desuper Apostolicae Servitutis Officium mentem nostram excitat & inducit ut ad ea, per quae Ecclesiarum & Monasteriorum omnium necnon Capellarum & Hospitalium necessitatibus valeat provideri, quantum cum Deo possumus, operosis Studiis & Remediis favorabiliter intendamus.
Dudùm siquidem, pro parte Carissimi in Christo Filii nostri Henrici Angliae Regis Illustris, Nobis exposito quòd Ipse, de propria Salute recogitans ac cupiens Terrena in Coelestia & Transitoria in Aeterna felici Commercio commutare, quâ ductus Devotione, quandam Capellam, cum una Cantaria, sub Invocatione Beatae Mariae Virginis, cum sufficienti numero Presbyterorum, qui inibi pro Animae suae Salute celebrare tenerentur, juxta Ecclesiam Collegiatam Sancti Georgii Opidi Windesorae Saresburiensis Dioecesis, ac unum Hospitale, in dicto Opido pro Pauperibus & aliis Miserabilibus Personis, ad illud pro tempore declinantibus in illo recipiendis, confovendis & alendis, de Bonis Propriis Fundare & Aedificare proponebat,
Nos tunc, dicti Regis in ea parte Supplicationibus inclinati, de Montisfont alias de Montesfonte ac de Luffuldia Prioratus Sancti Augusti & Sancti Benedicti Ordinum Wintoniensis & Lincolniensis Dioecesuum, qui Conventuales de jure Patronatûs Regis Angliae pro tempore existentis erant, illorumque Nomina Ordines Dignitates & Dependentias Auctoritate Apostolicâ penitùs Suppressimus & Extinximus, necnon Structuras Aedificia & Bona omnia dictorum Prioratuum Mensae Capitulari dictae Ecclesiae perpetuò Applicavimus, Appropriavimus & Assignavimus, ita quod, Cedentibus vel Decedentibus modernis Dictorum Prioratuum Prioribus seu Prioratus praedictos aliàs quomodolibet Dimittentibus, liceret Dilectis Filiis Decano & Capitulo dictae Ecclesiae Sancti Georgii per Se vel alium seu alios corporalem Structurarum Aedificiorum & Bonorum hujusmodi Possessionem propriâ Auctoritate liberè apprehendere, ac in Mensae Capitularis dictae Ecclesiae, necnon Capellae Cantariae & Hospitalis praedictorum Usus Utilitatemque convertere, Dioecesani Loci & cujusvis alterius Licentiâ super hoc minimè requisiteâ,
Translatis tamen Prioribus praedictorum Prioratuum ac Canonicis & Monachis in illis respectivè degentibus ad
Loca alia dictorum Ordinum regularia, & assignatis eis quoad viverent de Fructibus Redditibus & Proventibus hujusmodi Pensionibus Annuis competentibus per Loci Ordinarium ex quibus Se commodè valerent sustentare, prout in diversis nostris desuper confectis Litteris pleniùs continetur,
Cùm autem, sicut accepimus, Suppressiones & Extinctiones, Appropriationes, Applicationes & Assignationes praedictae hactenus effectum sortitae non suerint, dictusque Henricus Rex ex eo ad Fundationem Capellae & Hospitalis praedictorum motus fuerit, quod ibidem suam proposuerat eligere Sepulturam, ac postmodùm ex certis Causis Propositum mutaverit, & Capellam cum Hospitali & Cantariâ praedictis infra Septa Monasterii Westmonasterii Londoniensis Dioecesis dicti Ordinis Sancti Benedicti, ubi Corpus Clarae Memoriae Henrici vi, Angliae Regis ipsius Henrici moderni Regis Patrui & Praedecessoris collocari cupit, Aedificari facere & Sepulturam suam ibidem eligere intendat,
Nos, qui dudum inter alia voluimus quòd petentes Beneficia Ecclesiastica aliis Uniri tenerentur exprimere verum Valorem secundùm communem Extimationem etiam Beneficii cui aliud Uniri peteretur, alioquin Unio non valeret, & semper in Unionibus commissio fieret ad Partes vocatis quorum interesset, Mensae Abbatialis dicti Monasterii & aliorum illi annexorum Fructuum Reddittuum & Proventuum veros Annuos Valores ipsorumque Prioratuum qualitates Praesentibus pro expressis habentes, Motu proprio, non ad ipsius Henrici moderni Regis vel alterius pro eo Nobis super hoc oblatae Petitionis instantiam, sed de nostra mera Liberalitate & ex certa nostra Scientia, singulas Litteras praedictas & in eis contenta Auctoritate Apostolicâ Tenore Praesentium Cassamus & Annullamus ac pro nullis infectis & viribus vacuis haberi Decernimus,
Et nichilominus de Montisfont cujus Quingentorum & Triginta & cujus Ducentorum & Sexaginta Florenorum Auri de Camera Fructus Redditus & Proventus, secundùm communem Extimationem Valorem Annuum, ut etiam accepimus, non excedunt, de Luffeldia, Prioratus praedictos illorumque Ordines, Dependentias, Dignitates, Nomina & Qualitates de novo Auctoritate Apostolicâ Tenore Praesentium Motu simili penitùs Supprimimus & Extinguimus, necnon Structuras Aedificia & Bona eorumdem Mensae Abbatiali hujusmodi pro illius ac Capellae Cantariae & Hospitalis praedictorum necessitatibus perpetuò Applicamus, Appropriamus & Assignamus, ità quòd, Cedentibus vel Decedentibus modernis dictorum Prioratuum Prioribus seu Prioratus praedictos aliàs quomodolibet Dimittentibus, liceat Dilectis Filiis Abbati & Conventui dicti Monasterii Westmonasterii per Se vel alium seu alios corporalem Structurarum Aedificiorum & Bonorum hujusmodi Possessionem propriâ Auctoritate liberè apprehendere & perpetuò retinere, ac in Mensae Abbatialis Capellae Cantariae & Hospitalis praedictorum Usus & Utilitatem convertere, Dioecesana Loci & cujusvis alterius Licentiâ super hoc minime requisiteâ,
Translatis tamen Prioribus dictorum Prioratuum, si forsan cesserint, Canonicisque & Monachis in dictis Prioratibus Degentibus ad alia Loca dictorum Ordinum regularia, & assignatis eis per locorum Ordinarios quoad vixerint de Fructibus Redditibus & Proventibus hujusmodi Pensionibus Annuis competentibus ex quibus valeant commodè sustentari,
Quocirca Venerabilibus Fratribus nostris, Dunelmensi & Londoniensi, ac Norwicensi, Episcopis, per Apostolica Scripta, motu simili, Mandamus quatinus Ipsi, vel Duo aut Unus eorum per Se, vel Alium, vel Alios, praesentes Litteras & in eis Contenta, dùm & quando expedire cognoverint & quotiens super hoc pro parte Abbatis & Conventûs praedictorum Westmonasterii fuerint super hoc requisiti, solemniter publicantes, ipsisque in Praemissis efficacis Defensionis Praesidio Assistentes, faciant Auctoritate nostrâ eosdem Abbatem & Conventum Structurarum Aedificiorum & Bonorum hujusmodi pacificâ Possessione gaudere, non permittentes eos super illis per quoscunque quomodolibet Molestari, Contradictores per Censuram Ecclesiasticam Appellatione postpositâ compescendo:
Non obstantibus Voluntate nostrâ praedictâ ac aliis Apostolicis necnon bonae Memoriae Octonis & Octoboni olim in dicto Regno Angliae Apostolicae Sedis Legatorum, in Provincialibus quoque & Sinodalibus Conciliis editis generalibus Constitutionibus & Ordinationibus Statutis quoque & Consuetudinibus Prioratuum & Ordinum praedictorum Juramento Confirmatione Apostolica vel quavis Firmitate aliâ roboratis, contrariis quibuscunque, aut si aliqui super Provisionibus sibi faciendis de Prioratibus hujusmodi speciales vel aliis Beneficiis Ecclesiasticis in illis Partibus gene-
rales dictae Sedis vel Legatorum ejus Litteras impetrârint, etiam si per eas ad Inhibitionem, Reservationem & Decretum vel aliàs quomodolibet sit Processum, quas quidem Litteras ac Processus habitos per easdem & inde secuta quaecunque ad dictum Prioratum Volumus non extendi, sed nullum per hoc eis quoad assecutionem Prioratuum seu Beneficiorum aliorum praejudicium generari, seu si aliquibus communiter vel divisim ab easdem sit Sede Indultum quod Interdici, Suspendi, vel Excommunicari non possint per Literas Apostolicas non facientes plenam & expressam ac de verbo ad verbum de Indulto hujusmodi mentionem, & quibuslibet aliis Privilegiis, Indulgentiis, & Litteris Apostolicis generalibus vel specialibus, quorumcunque Tenorum existant, per quae Praesentibus non expressa vel totaliter non inserta effectus earum impediri valeat quomodolibet vel differri, & de quibus quorumque totis Tenoribus habenda sit in nostris Litteris mentio specialis.
Proviso quòd dicti Prioratus propterea ad Prophanos Usus non redigantur, sed in illorum Ecclesiis interdum missae celebrentur,
Nos enim praesentes Litteras & in eis contenta, per quascunque Revocationes Unionum, Annexionum, & Incorporationum effectum non sortitarum, quascunque Derogatoriarum Derogatorias, aliasque fortiores & efficaciores Clausulas in se continentes nullatenus revocari seu suspendi posse, Irritum quoque & Inane quicquid secus super hiis a quoquam quavis Auctoritate scienter vel ignoranter contigerit, attemptari Decernimus.
Nulli ergo omnino Hominum liceat hanc paginam nostrae Cassationis, Annullationis, Constitutionis, Suppressionis, Extinctionis, Applicationis, Appropriationis, Assignationis, Mandati, Voluntatis, & Decreti infringere &c.
Dat. Romae apud Sanctum Petrum, Anno Incarnationis Dominicae Millesimo, Quadringentesimo, Nonagesimo nono, Tertiodecimo Kal, Februarii, Pontificatûs nostri Anno octavo.
L. Podocatharus.
Super Plicam,
P. Tuba.
Alexander Papa Sextus.
Sub Sigillo Plumbeo a filis sericis slavi rubeique colorum pendente. |
Jan. 20. Confirmation by Ferdinand and Isabella [Elizabetha], K. and Q. of Castile, of a treaty with Henry VII. for peace and mutual assistance and for the marriage of Arthur prince of Wales with their daughter Katharine, dated London, July 10, 1499. Seville.
O. xii. 741. H. v. p. iv. 147. |
Tractatus, de Matrimonio Principis Walliae cum Infanta Ispaniae, Confirmatio.
An. 15. H. 7. Ex Autogr.
Ferdinandus & Elizabetha, Dei gratiâ, REX & REGINA Castellae, Legionis, Aragonum, Siciliae, Granatae, Toleti, Valentiae, Galleciae, Majoricarum, Hispalis, Sardiniae, Cordubae, Corsicae, Murciae, Giennis, Algarbii, Algezirae, Gibraltaris, & Insularum Canariae, COMES & COMITISSA Barchinonae, DOMINI Vizcayae & Molinae, DUCES Athenarum & Neopatriae, COMITES Rossilionis & Ceritaniae, MARCHIONES Oristani & Gociani,
Benivolentiam, Amicitiam, & Unanimem Christianorum Principum Concordiam, compertum habemus non ipsis tantùm Principibus, & eis qui eorum Imperio Subditi sunt, verùm etiam toti Reipublicae Christianae, Utilem fuisse: Et è contra, ex hac quemadmodùm Necessitudine mutuoque Amore multa undique Beneficia suboriuntur; sic, si Discordes & bono nequaquam Animo inter Se vixerint, multa inde Incommoda, & plurima passim Dampna subsequuntur.
Et quoniam omnes Religionis nostrae Sanctissimae Principes elaborare tenemur non ut Subditi tantum nostri Quiete agant, verùm ut in tota Religione Christiana eadem, pro Publico Bono, Quies Paxque servetur, longeque magis hoc tempore id eniti conarique debemus, in quo Turcarum Princeps, Sanctissimae Fidei Inimicus, Arma ad eam evertendam a tota Asia & Graecia concitavit, & quoniam nostra Serenissimique Enrici Angliae Regis Fratrisnostri Carissimi Necessitudo & Amicitia huic rei prodesse plurimùm potest, superiorum etiam temporum memoriam recolendo, in quibus summa inter Reges Majores nostros Nosque ac eundem Serenissimum Regem & Antecessores suos Angliae Reges Amicitia intercessit, optantes nimirum ut ipsa majus indiès Incrementum nanciscatur, praecipuè cùm Illustrissimi Arthuri Waliae Principis Filii sui Primogeniti & Haeredis Conjugium cum Illustrissima Catherina Principe Waliae Infante Castellae & Aragonum Filia nostra Carissima, ad hoc idem Prosequendum Nos Jure Naturaque devinciant,
Haec omnia animadvertentes & magna praeterea Merita summas Virtutes & ingens quod in praefato Serenissimo Rege Angliae Fratre nostro Carissimo Ornamentum viget libentissimè animo ad Confirmandum, Corroborandum quicquid ad Comune Bonum nostrae ipsiusque Amicitiae augendae Incrementum ceptum est,
Igitur, universis & singulis, praesentes Litteras inspecturis, Notum facimus quòd, cùm nuper inter Nos, per Rode-
ricum Gundisalvi de Puebla Jurisconsultum, Consiliarium, Oratorem, & Procuratorem nostrum, Nomine nostro, & in Vim Mandati seu Procurationis, a Nobis eidem concessae, pro Nobis ac Illustrissimo Principe Michaele Principe Castellae, Aragonum, & Portugaliae Nepote & Legitimo Haerede nostro, aliisque Haeredibus & Successoribus, ac Regnis, Dominiis, & Subditis nostris, Parte ex una, & praedictum Serenissimum Henricum Angliae Regem Fratrem nostrum, per Reverendum in Christo Patrem Thomam Londoniensem Episcopum Consiliarium & Deputatum suum, ejus Nomine, Vigore Mandati seu Procurationis, ab eodem Serenissimo Rege Angliae eidem Episcopo Londoniensi concessae, pro eo ac Illustrissimo Arthuro Principe Walliae ejus Filio Primogenito & legitimo Haerede, eorumque Haeredibus & Successoribus Angliae Regibus, Regnis, Dominiis, & Subditis suis, Parte ex altera, fuerit inita, concordata, firmata, & jurata Amicitia, Concordia, Liga, Unio, Confoederatio, & Pax, sub Forma & Capitulis sequentibus,
Cùm Serenissimos, Celebris Memoriae, Principes, ad Unitatem Pacis suas vires exhibuisse noscamus, Principumque Officium exigat omninò Pacem tueri, ad Dissipandam & Infringendam Hostium Fortitudinem, & eorum Vires tollendas, ut Status Principum tranquillè conserventur, nullum aptius Remedium videtur quàm Orthodoxos Principes Vires suas unire, Pacem ac Concordiam perpetuo Foedere, Vinculo Caritatis, inter Sese connectere: cùm Humanis Rebus nihil pernitiosius Bello aut Discordia esse possit: nec quicquam salubrius Pace; Inhaerentes Doctrinis Sacrae Legis, quibus Pacis Unio cunctis Regibus ac Fidelibus Populis commendatur, Domino Mandante habete Salutem in vobis & Pacem habete inter vos,
Hiis itaque omnibus Pacem suadentibus accedit Sanguinis Necessitudo & Propinquitas, quae inter Serenissimum & Invictissimum Principem Henricum Septimum Angliae Franciaeque Regem & Dominum Hiberniae ac Illustrissimos & Potentissimos Principes Ferdinandum & Elizabetham Regem & Reginam Castellae & Legionis, Aragonum, Siciliae, Granatae, &c. Supremos Dominos nostros, necnon Gloriosissima Matrimonialis Conjunctioque nuper inter Illustrissimum Dominum Arthurum Principem Walliae, Ducem Cornubiae, & Comitem Cestriae Primogenitum praefati Serenissimi Regis Angliae & Franciae, & Excellentissimam Dominam Katerinam Filiam praefatorum Regis & Reginae Hispaniarum feliciter emerserit,
Quocirca cùm ad Statuum praedictorum Principum Conservationem tutiùs securiusque retinendam praefati Principes ad certas Pacis Conditiones inclinati, eorum Oratores & Commissarii superinde statuerunt; videlicet,
Pro Parte Serenissimi Regis Angliae & Franciae Reverendus in Christo Pater Dominus Thomas Londoniensis Episcopus, Et pro Parte Dominorum Regis & Reginae Hispaniarum Honorandus Dominus Doctor de Puebla,
Auctoritate sufficienti in hac parte eis commissâ (cujus quidem Auctoritatis Tenores in certis Instrumentis, super dicto Contractu Matrimoniali confectis, & eisdem insertis, plenè continetur) post multa ultrò citroque Tractata & diu Communicata, tandem in hos Articulos sequentes Condescenderunt, & super eosdem Convenerunt, Concordârunt, & Concluserunt, prout sequitur; videlicet,
Inprimis, Tractatum, Concordatum, & Conclusum est quòd inter praefatum Serenissimum Principem Henricum Septimum Angliae Franciaeque Regem Dominum Hiberniae Illustrissimumque Dominum Arthurum Walliae Principem ejus Primogenitum Filium & Haeredem eorumque Haeredes & Successores ex Parte una, & Serenissimos Principes Ferdinandum & Elizabetham Castellae, Legionis, Aragonum, Siciliae, Granatae, &c. Regem & Reginam, Illustrissimumque Principem Michaelem eorumdem Nepotem & legitimum Haeredem eorumque Haeredes & Successores ex parte altera, eorum Regna, Dominia, Patrias, & Loca quaecumque impraesentiarùm per eos possessa, necnon & eorum Vassallos, Homines, & Subditos tàm Ecclesiasticos quàm Seculares, cujuscumque Statûs, Gradûs, seu Conditionis fuerint, tàm per Terram quàm per Mare & Aquas dulces ac ubique Locorum, ab hac Die de caetero, bona, realis, sincera, vera, integra, perfecta, firma Amicitia, Concordia, Liga, Unio, Confoederatio, & Pax firma atque perpetua sit habitura, & pro futuris perpetuis temporibus inconcussè & inviolabiliter custodita & conservata, ita quòd Partes praedictae (videlicet) praefatus Serenissimus Rex Angliae & Franciae, & antedicti Illustrissimi Domini Hispaniarum Rex & Regina, Principesque praedicti sui Haeredes eorumque Successores, sint veri, fideles, & perpetui Amici, Concordes, Alligati, Uniti, &
Confoederati ad Conservandum Seipsos & eorum alterum & suos praedictos Haeredes in suis Statibus, Regnis, & Dominiis, per eos, ut praedictum est, impraesentiarùm possessis, & ad Defensionem illorum contra omnes Homines Mundi, absque aliqua Exceptione seu Reservatione; ita quòd quicumque Princeps vel alius qui Regna, Terras, Dominia, seu Loca praefatorum Dominorum Regum Haeredum & Successorum suorum, ut praedicitur, per Terram vel Mare vel quovis modo Offendere vel Invadere moliantur, pro Viribus suis Illum vel Illos Refraenabunt, Impedient, & pro suo Posse Resistent ac Defendent, necnon ipsi Principes praefati eorumque Haeredes, ut praedicitur, adinvicem se juvabunt quandocumque & quotienscumque opus fuerit Auxilio cum omni sua Possibilitate, bonâ Fide, & absque Dolo sive aliquâ Fraude, secondùm Ordinem infra sequentem.
Item, Conventum & Conclusum est quòd neuter praefatorum Principum praestabit Auxilium, Consilium, vel Favorem Inimicis alterius Partis Invadere volentibus; sed praefatus Illustrissimus Rex Angliae & Franciae & praedicti Domini Rex & Regina Hispaniarum Haeredes & Successores sui contra omnes Principes vel alios quoscumque, absque aliquâ Exceptione seu Reservatione nominata vel innominata, qui Terras, Regna, Dominia, & Loca ipsorum quae nunc possident Impugnare vel Invadere nitantur vel moliantur, seu Guerram aut Bellum facere aut movere super hiis praesumpserint, adinvicem se adjuvabunt, & quod hujusmodi Juvamen, Succursus, & Auxilium fiat & praestetur infra spatium Duorum Mensium a tempore Requisitionis, Expensis tamen Principis Interpellantis & Requirentis; Quod Auxilium, Succursum, Juvamen, & adjutorium facere seu agere teneantur bonâ fide & efctualiter sicut facerent in suis propriis Negotiis; videlicet,
Quòd si contingat praefatum Serenissimum Regem Angliae suosque Haeredes & Successores praedictos Hominibus Armatis Equestribus vel Pedestribus, aut Sagittariis vel Navibus Armatis, aut aliis Auxiliis Bellicis imposterùm indigere, ac pro & super eisdem Subsidium a dictis Dominis Rege & Regina Hispaniae eorumque Haeredibus & Successoribus praedictis, & super hujusmodi Indigentiam per Literas vel Nuncios sufficientes requisierint, in tali Casu Dominus Rex & Domina Regina Hispaniarum eorumque Haeredes & Successores, bonâ fide absque difficultate aliqua, juxta hujusmodi Requestam facere seu agere teneantur, adeum Numerum Armigerorum & Sagittariorum, ac Navium Armatarum, seu aliorum Auxiliorum Bellicosorum quem Rerum ac Temporum Opportunitate propriaque Necessitate consideratis praestare possunt & poterunt, Sumptibus tamen Stipendiis & Expensis rationabilibus praefati Domini Regis Ang. Haeredum & Successorum suorum: quae Expensae & Stipendia taxabuntur & moderabuntur, habito respectu ad Forum Victualium quod in Partibus tunc temporis contigerit secondùm Loci & Temporis Ubertatem aut Sterilitatem; qui Armigeri & Sagittarii, ac Naves Armatae, seu alia Auxilia Bellica Regis & Reginae Hispaniarum debitè & fideliter praefato Regi Angliae & suis Haeredibus atque Successoribus in ipsorum Guerris circa Praemissa inservient per Terram & per Mare, secundùm mentem & voluntatem praefati Domini Regis Angliae Haeredum & Successorum suorum quamdiu duxerint eos Retinendos,
Et, pari modo, si contingat praefatos Dominos Regem & Reginam Hispaniarum eorumque Haeredes & Successores praedictos Hominibus Armatis Equestribus vel Pedestribus, aut Sagittariis vel Navibus Armatis, aut aliis Auxiliis Bellicis imposterùm indigere, ac pro & super eisdem Subsidium a dicto Domino Rege Angliae, ejusve Haeredibus & Successoribus praedictis, & super hujusmodi Indigentiam per Literas vel Nuncios sufficienter requisierint, in tali Casu Dominus Rex Angliae, ejusve Haeredes & Successores bonâ fide absque difficultate aliqua juxta hujusmodi Requestam facere seu agere teneatur ac teneantur ad eum Numerum Armigerorum & Sagittariorum Naviumque Armatarum, seu aliorum Auxiliorum Bellicosorum, quem Rerum aut Temporum oportunitate propriaque Necessitate consideratis praestare possit, poterit, & poterint, Sumptibus tamen Stipendiis & Expensis rationabilibus praefatorum Dominorum Regis & Reginae Hispaniarum Haeredum & Successorum suorum, quae Expensae & Stipendia taxabuntur & moderabuntur, habito respectu ad Forum Victualium, quod in Partibus tunc temporis contigerit, secundùm Loci & Temporis Ubertatem aut Sterilitatem; qui Armigeri & Sagittarii, ac Naves Armatae, & alia Auxilia Bellica Domini Regis Angliae debitè & fideliter praefatis Dominis Regi & Reginae Hispaniarum & eorum Haeredibus & Successoribus, in ipsorum Guerris, circa Praemissa inservient, per Terram & per Mare, secundùm mentem & voluntatem praefatorum Dominorum Regis &
Reginae Hispaniarum Haeredum & Successorum suorum quamdiu duxerint eos Retinendos.
Item, Conventum, Concordatum, & Conclusum est quòd, in omnibus aliis Causis & Negotiis, non tangentibus hanc Amicitiam, nec Derogantibus illi seu alicui Articulo ejus, per praefatum Dominum Angliae Regem & Dominos Hispaniarum Regem & Reginam Excipiuntur seu Reservantur Summus Dominus noster Maximus Pontifex, & Serenissimi Domini Maximilianus & Ludovicus Romanorum Gallorumque Reges, & Illustrissimus Dux Philippus Archidux Austriae, tali modo quod per istam Exceptionem & Reservationem non videatur nec intelligatur praejudicium aliquod huic praesenti Amicitiae fieri; set quod in omnibus, in hac praedicta Amicitia hic contentis seu specificatis, firma & integra ac validissima semper maneat, tanquam si non fuissent Excepti & Reservati praenominati Sanctissimus Dominus noster & Romanorum & Gallorum & Archidux Austriae Principes, quia, ut dictum est, haec Exceptio seu Reservatio intelligitur in aliis Causis & Negotiis, non tangentibus hanc Amicitiam, nec illi in Parte aliqua Derogantibus.
Item, Concordatum & Conclusum est quòd praedicti Vassalli, Homines, & Subditi praefatorum Principum, tàm Mercatores quàm caeteri alii hinc inde, tutè liberè absque alicujus Licentia Salvive Conductûs generalis vel specialis Petitione vel Impetratione, in & ad praefatorum Dominorum utriusque Principum eorumque Haeredum & Successorum Portus, Dominia, Castra, Civitates, Fortalitia, Oppida, Jurisdictiones, & Districtus quoscumque, cum suis Conductis vel accommodatis Navibus, Plaustris, Vehiculis, Equis, Armaturis, Mercibus, ac Mercimoniis, Bonis & Rebus quibuscumque, tàm per Terram quàm per Mare & Aquas dulces atque omnem Locum, quotienscumque & quandocumque id faciendum esse duxerint, Navigare, Equitare, Ire, & Discedere in eisdem, quamdiu voluerint, omnis generis Merces & Mercimonia Emere & Vendere, Mercari, Negotiari, Morari, atque Perhendinare, necnon ab eisdem cum suis Rebus, Mercibus, & Mercimoniis, & Bonis quibuscumque salvi & securi per Terram, Mare, & Aquas dulces abire & recedere, & in omnibus & ubique ita justè & honestè tractabuntur, ac si essent Originarii & Subditi proprii; Juribus, Statutis, & Consuetudinibus Locorum in omnibus semper salvis.
Item, Concordatum & Conclusum est quòd praedicti Rex Angliae ejusque Filius Primogenitus & Haeres eorumve Haeredes & Successores antedicti praefatorum Regis & Reginae Hispaniarum eorumque praedictorum Haeredum & Successorum Rebellibus, quibuscumque praesentibus & futuris, contra praefatos Dominos Regem & Reginam Hispaniarum, eorum vel Haeredes & Successores, per Terram, Mare & Aquas dulces, ex causa vel occasione quacumque, praesenti vel futureâ, Consilium, Auxilium vel Favorem, publicè vel occultè, directè vel indirectè, non dabunt nec praestabunt, aut aliàs quovis modo Juvabunt, nec Subditos praedictorum Regis & Reginae Hispaniarum suorumve Successorum praedictorum Rebelles in suis Regnis, Dominiis, Locisve scienter Receptabunt Receptarive facient, nec in eisdem Morari aut Auxilium vel Favorem habere permittent: &, si Morari in eisdem Terris praesumpserint, eosdem Capient vel Capi facient, & ad Manus Regis & Reginae Hispaniarum Tradent & Tradi facient: &, simili modo, praefati Domini Rex & Regina Hispaniarum eorumque Haeredes & Successores praefatorum Serenissimi Regis Angliae ejusque Filii Primogeniti & Haeredis eorumque praedictorum Haeredum & Successorum Rebellibus quibuscumque, praesentibus & futuris, contra praefatum Illustrissimum Regem Angliae, ejusque Filium Primogenitum & Haeredem, eorumve Haeredes praedictos & Successores, per Terram, Mare & Aquas dulces, ex causa vel occasione quacumque praesente vel futura, Consilium, Auxilium vel Favorem, publicè vel occultè, directè vel indirectè, non dabunt nec praestabunt, aut aliàs quovis modo Juvabunt, nec Subditos praedicti Serenissimi Regis Angliae ejusve Successorum Rebelles in suis Regnis, Dominiis, Locisve scienter receptabunt receptarive facient, nec in eisdem Morari aut Auxilium vel Favorem habere permittant; &, si Morari in eisdem Terris praesumpserint, eosdem Capient vel Capi facient, & ad Manus Regis Angliae Tradent vel Tradi facient.
Item, Concordatum & Conclusum est quòd praefatus Illustrissimus Rex Angliae ejusque Filius Primogenitus & haeres eorum Haeredes & Successores praedicti in omni Treuga, Pace, Liga, Confoederatione, vel Unione quacumque, quam cum aliquo Principe, Universitate, Comunitate, Societate, vel Homine quocumque ab hac Die de caetero concordabunt & concludent, praefatos Regem & Reginam Castellae, Legionis, Aragonum,
Siciliae, Granatae, &c. eorumque Haeredes & Successores, ut praedicitur, specialiter & nominatim Comprehendent, si in eisdem Comprehendi voluerint:
Et, simili modo, praedicti Rex & Regina Castellae, Legionis, Aragonum, Siciliae, Granatae, &c. eorumque Haeredes & Successores praefati in omni Liga, Pace, Treuga, Confoederatione, & Unione quacumque, quam cum aliquo Principe, Universitate, Communitate, Societate, vel Homine aliquo ab hac Die inantea, concordabunt & concludent, praefatum Serenissimum Regem Angliae ejusque Filium Primogenitum & Haeredem, eorumque Haeredes & Successores, ut praedicitur, specialiter & nominatim Comprehendent, si in eisdem Comprehendi voluerint.
Item, Concordatum & Conclusum est ut Captiones, Pignorationes, Marchae, & Reprisaliae Navium & Personarum Bonorumve utriusque Partis, eorumque Vassallorum & Subditorum de caetero cessent; sed quandocumque aliqua Navis indigena exitura est ab aliquo Portu tàm Regnorum & Dominiorum Angliae, Hiberniae, &c. quàm Castellae, Legionis, Aragonum, Siciliae, Granatae, &c. Majores & Gubernatores, & alii Officiales, quibuscumq; Nominibus appellentur, talis Villae, Oppidi, seu Portûs unde exitura est, capiant sufficientes Securitates a Dominis seu Possessoribus, Magistris, Patronis, vel Bursariis Navis, ad Duplum Valoris Navis Apparatûs & Victualium ejusdem, quòd Magistri, Marinarii, Nautae, & omnes in ea Navi existentes, cujuscumque Statûs seu conditionis existant, servabunt hanc Pacem erga quoscumque Subditos Patriarum, Regnorum, Dominiorum, Terrarum alterius Partis, & nullam eis Injuriam seu Violentiam in Terra, Mari, Fluminibus, aut in Portu aliquo facient seu inferent; Et, si hujusmodi Securitates praestare noluerint, non permittent ipsi Majores, Gubernatores, & Officiales praedictorum Oppidorum seu Portuum, ubi Casus ille acciderit, Navem hujusmodi quoquo modo exire: Quotiens autem Securitatem praemissam Majores, Gubernatores, & Officiales praedicti exigerint seu receperint, dabunt Literas auctenticas, sub eorum Sigillo, Possessoribus, Magistris, seu Bursariis illius Navis ita assecuratae, Testificantes ipsam Securitatem praestitam, ad finem ut, ipsarum Literarum vigore, Navis hujusmodi alios, ad quos forsitan applicabit, Portus liberè exire valeat.
Providebunt etiam praefati Reges & Principes, eorumque Haeredes & Successores, ut praemittitur, per suas Literas, ad suos Gubernatores & Officiales Oppidorum & Portuum suorum Regnorum & Dominiorum mittendas, taliter quòd ipsi omnia & singula Praemissa de tempore in tempus observabunt & observari facient: Et praefati Officiales teneantur, infra Quadraginta Dies proximò sequentes a Die Requisitionis sibi factae per Partem Dampnificatam computandos, exeque praedictam Obligationem contra Magistrum Navis & ejus Fidejussores, qui tale Dampnum intulit: Et quòd omnes Literae Marcharum & Reprisaliarum, hactenus per praedictos Reges & Praedecessores suos concessae, contra Subditos alterius Partis, sint Suspensae, & vigore earum nulla Executio fieri possit, sed de novo fiat Requisitio ad Instantiam Dampnificatorum, & eis fiat Justitia per Superiorem Dampnificantis, & in ejus Denegationem, servatâ formâ in similibus Casibus consuetâ, possint dari & concedi Marchae seu Reprisaliae contra Subditos & Vassalos Principis Justitiam Denegantis.
Item, quòd si per Subditos praedictorum Regum vel per aliquem Subditorum unius vel alterius Partis eorumdemve Haeredum & Successorum, ut praedicitur, quicquam imposterùm, ubique locorum, contra vim, formam, & effectum praesentis Tractatûs & Conclusionis Pacis, Concordiae, Amicitiae, Ligae, Unionis, & Confoederationis factum vel attemptatum fuerit (quod Deus avertat) illud sic factum vel attemptatum, quotiens id acciderit, ad Requisitionem Partis contra quam id factum vel attemptatum esse praetenditur, per debita & oportuna Remedia Restituatur & Reparetur; sed per hoc huic praesenti Pacis, Concordiae, Amicitiae, Ligae, Unionis, & Confoederationis Tractatui in nullo praejudicetur, nec propter Tale factum vel attemptatum eadem Pax, Liga, Unio, & Confoederatio Rumpi vel Dissolvi censebitur, sed nichilominus in suo Robore permanebit & Effectu.
Item, Concordatum, Conventum, & Conclusum est quòd, si aliquis Vassallus, Homo, vel Subditus alterius Partis per Vassallos, Homines, vel Subditos alterius contra vim, formam, & effectum praesentis Tractatûs & Concordiae, in aliquo Laesus vel Dampnificatus fuerit, & super hoc in illis Locis & per illos Judices, ubi & per quos in talibus Casibus de Justitia provideri debet, Reformationem & Reparationem consequi non valuerit, nichilominus praesens Tractatus & Concordia in suo Robore permaneat; & Pars sic Dampnificata, quae ut prae-
mittitur, Reparationem consequi non valuerit, cum Commendatitiis & Admonitoriis Literis sui Principis ad alterum Principem recurret; ipseque, Defectum Officialium suorum supplens, illi de debito Juris Remedio providebit; nec antea Literae de Reprisaliis vel Marcha vel Contromarcha impetrentur vel concedantur.
Item, Concordatum & Conclusum est quòd uterque Principum praefatorum, infra Sex Menses post harum Confoederationum perfectam Conventionem & ipsarum Literarum Traditionem, teneatur hunc Tractatum Treugarum Pacis, Unionis, & Concordiae, Confoederationis & verae Amicitiae in omnibus & singulis insignioribus Locis Regnorum & Dominiorum suorum, tàm per Littora Maris quàm super Terram & in Portubus eorumdem, publicè & solenniter Proclamari, Notificari, & Publicari facere, prout in tali Casu antiquitùs fieri consuevit.
Item, nè Afflictae detur Afflictio, Conventum & Conclusum est quod, si aliqua Navis Angliae, Hispaniae, vel alterius Loci sub Dominio & Ditione praedictorum Principum Vi Ventorum Quassata fuerit & passa Naufragium, & Bona vel per Aquarum vehementiam vel per aliam quamcumque Causam ad Litora alterius Principis producta sint, quòd tunc Praepositus vel Officialis ipsius Loci, statim & incontinenti post habitam Notitiam in quorum Manibus hujusmodi Bona seu Mercimonia sunt, facient fieri Sequestrum omnium praedictorum Bonorum seu Mercimoniorum sic salvatorum: Et, si Pars Laesa infra Viginti Menses, per Signa sua consueta, vel per alias legitimas Probationes Proprietatem probaverit, quòd illico Bona Proprietario Restituantur; Proviso quòd, si dicta Bona seu Mercimonia sint de Rebus quae servando servari non possunt, quòd in tali Casu praedicti Praepositi vel Officiales possint & debeant hujusmodi Bona & Mercimonia Vendere & Pretium Servare ad Utilitatem Proprietarii: Et, si infra tempus praedictorum Viginti Mensium aliquis Proprietarius non venerit, tunc servetur Jus Comune illius Regni ubi hujusmodi Bona applicuerunt; salvo tamen ei vel eis, qui hujusmodi Bona in Mari Litoribusve recuperaverunt, pro ejus vel eorum Laboribus justo & rationabili Salario, per Quatuor Legales Homines ad hoc Juratos taxando.
In cujus Rei Testimonium Nomina Manu propriâ subscripsimus & Sigilla nostra apposuimus.
Dat. in Civitate London. Decimo Die Julii, Anno Domini Millesimo, Quadringentesimo, Nonagesimo nono.
Thomas London. Episcopus. Doctor De Puebla.
Cumque praeinserta Amicitiae, Concordiae, Ligae, Unionis, Confoederationis, & Pacis Capitula, omniaque & singula in illis contenta Nobis gratissima sint ac maximè placeant, velimusque omnia & singula nostris Patentibus Litteris, Manibus propriis subscriptis, ac nostro Regio Sigillo munitis Confirmare, Approbare, & Corroborare, idcircò praesentibus Litteris nostris omnibus melioribus viâ, modo, & formâ quibus meliùs & validiùs de jure possumus & debemus, praeinserta Amicitiae, Concordiae, Ligae, Unionis, Confoederationis, & Pacis Capitula, omniaque & singula in illis & quolibet eorum contenta, juxta sui seriem & tenorem Laudamus, Approbamus, Ratifficamus, & Confirmamus, ac Rata, Grata, & Firma habemus, &, si necesse est, ea omnia & singula de novo Concedimus & Firmamus,
Et insuper Promittimus & Juramus, super Sancta Dei Quatuor Evangelia corporaliter & manualiter per Nos tacta, bonâ Fide & in Verbo Regio tenere, & adimplere, ac inviolabiliter observare, pro Nobis, Regnis, Terris, & Ditionibus nostris, omnia & singula, in praeinsertis Amicitiae, Concordiae, Ligae, Unionis, Confoederationis, & Pacis Capitulis contenta, prout in eisdem cavetur & continetur, & contra ipsa quovis modo directè vel indirectè non venire sub Obligatione & Ypotheca omnium Bonorum nostrorum praesentium & futurorum, necnon sub Poena Perjurii, quam Rex & Regina possunt tali Casu incurrere,
Insuper, Nos tanquam Avi, Tutores, & Curatores Personae praefati Illustrissimi Principis Michaelis Nepotis & Haeredis nostri carissimi, Promittimus, Pollicemur, & Juramus ad Dominum Deum nostrum Jhesum Christum, & ejus Sanctam Crucem, & Sancta Quatuor Evangelia, quòd, postquam praedictus Illustrissimus Princeps Michael Nepos & legitimus Haeres noster Carissimus, Deo annuente, pervenerit ad Aetatem Annorum Quatuordecim, dabimus operam cum effectu, quòd Jurabit solempniter, & in forma debita, per Se & Successores suos Tenere & inviolabiliter Observare, ac Teneri & Observari facere A-
micitiam, Concordiam, Ligam, Unionem, Confoederationem, Pacem, Pacta, & Promissa contenta & contentas in praeinsertis Capitulis juxta illorum & illarum seriem & tenorem, & contra eas vel ea directè vel indirectè non facere vel venire, sub Obligatione omnium Bonorum suorum, ac sub Poena Perjurii quam Princeps potest tali Casu incurrere; praeterea Volumus, quòd in hujusmodi Amicitia, Liga, Confoederatione, & Pace comprehendatur Serenissimus Emanuel Rex Portugaliae Filius noster Dilectissimus.
In quorum omnium & singulorum praedictorum Testimonium, praesentes Litteras Manibus nostris signavimus, Sigillique nostri munimine jussimus roborari.
Datum & Actum in Urbe Hispaliensi, Die Vicesimo Mensis Januarii, Anno a Nativitate Domini Millesimo Quingentesimo.
Praesentibus ibidem,
Guterrio de Cardenas Praeceptore Majore Legionis Ordinis Sancti Jacobi de Spata,
Joanne Chacon Praefecto Murciae,
Majoribus Computatoribus nostris,
Joanne Velasques Computatore Majore Illustrissimi Principis Nepotis & Haeredis nostri Carissimi,
Consiliariis nostris,
Testibus ad Praemissa vocatis, & aliis pluribus.
Eyo El Rey.
Eyo La Reyna.
Et ego Michael Perez Dalmacan, praedictorum Serenissimorum & Potentissimorum Dominorum nostrorum Regis & Reginae Secretarius, ac Publicus Apostolicâ & Regiâ Auctoritatibus Notarius, Praemissis omnibus & singulis unà cum praenominatis Testibus interfui, eaque sic fieri vidi & audivi, & in Notam sumpsi, ideoque praesens Publicum Instrumentum, alterius Manu in his Quatuor Foleis Pergamenae scriptum, inde confeci, & in hanc Publicam Formam redegi, Signoque meo solito signavi, in Fidem & Testimonium omnium & singulorum Praemissorum.
Constat de suprapositis in secundo Foleo, ubi legitur PRAEDICTI, & in tertio Foleo TENEANTUR.
Michael Perez Dalmacan. |
